యూపీలో భాజపాదే అధికారం: అమిత్ షా

ఉత్తర్‌ప్రదేశ్ అసెంబ్లీ ఎన్నికల్లో భారతీయ జనతా పార్టీ మూడింట రెండింతల మెజార్టీ సాధిస్తుందని ఆ పార్టీ అధ్యక్షుడు అమిత్ షా అన్నారు. యూపీ ఎన్నికల మ్యానిఫేస్టో ఈ రోజు విడుదల చేసిన తర్వాత ఆయన మీడియాతో మాట్లాడారు. యూపీలో తమపార్టీ అధికారంలోకి వస్తుందని అన్నారు. 30 లక్షల మంది ప్రజల నుంచి ఫోన్, లేఖల ద్వారా ఫీడ్‌బ్యాక్ తీసుకున్నామని షా పేర్కొన్నారు. యువతకు ఉద్యోగాల కల్పించి, రాష్ట్రంలో శాంతిభద్రతలను మెరుగుపరుస్తామని అన్నారు.

వ్యవసాయ రుణాలతోపాటు విద్యార్థులకు ఇంటర్ వరకు ఉచిత విద్యను అందిస్తామని తెలిపారు. అధికారంలోకి వస్తే రాష్ట్రంలో 24 గంటల విద్యుత్తును సరఫరా చేస్తామని పేర్కొన్నారు. సమాజ్‌వాదీ, బహుజన్ సమాజ్ పార్టీలు గత పదిహేనేళ్లుగా యూపీని దోచుకున్నాయని, మమ్మల్ని గెలిపిస్తే అభివృద్ధి చేసి చూపుతామని షా అన్నారు. ఉత్తర్‌ప్రదేశ్‌కు కేంద్రం రూ.లక్ష కోట్లు నిధులు మంజూరు చేసినా ఎలాంటి అభివృద్ధి జరగలేదని, శాంతిభద్రతలు మరీ తీసుకట్టుగా మారాయని వ్యాఖ్యానించారు.