పెళ్లి ఖర్చులు రూ.5లక్షలు మించితే అంతే..!

అంగరంగవైభవంగా పెళ్లిళ్లు జరగడం ఈ రోజుల్లో ఓ ఫ్యాషన్..స్టేటస్ సింబల్. ఒకరు ఆకాశమంతా పందిరి వేస్తే..మరొకరు ఆకాశంలోనే పెళ్లి చేస్తారు. తమతమ పరపతిని ప్రపంచానికి చాటిచెప్పడానికి వీడియో పెళ్లి ఆహ్వాన పత్రికలు తయారు చేయిస్తారు. కోట్లాది రూపాయాలు ఖర్చు చేసి కనివినీ ఎరుగని రీతిలో చేసి పెళ్లిలో..వచ్చి పోయే అతిథులకు బహుమతులు ఇచ్చి పంపుతుంటారు. రిచ్, సూపర్ రిచ్ వర్గాలు చేసే పెళ్లి హడావుడి అంతాకాదు. వీళ్లనే పేద, మధ్య తరగతి వర్గాల ప్రజలు తమ ఇంట్లో పెళ్ళిళ్ళకు అప్పులు చేసి మరి కాస్తో కూస్తో ఘనంగానే చేశామనిపించుకుంటారు.

కానీ పెళ్లి పేర దుబార ఖర్చు చేయకుండా...పేదవాడికి పెళ్లి తంతు ఓ యజ్ఞంలా పరిణమించకుడా..ఉండేందుకు పార్లమెంటులో చట్టం చేయాలని ఓ ఎంపీ కోరుతున్నారు. ఇందుకు తగ్గట్టుగా వచ్చే సమావేశాల్లో ప్రైవేటు మెంబర్ బిల్లు ప్రవేశపెట్టాలని కాంగ్రెస్ ఎంపీ రంజిత్ రంజన్ ప్రయత్నిస్తున్నారు.

తప్పనిసరి వివాహా నమోదు, అవసర ఖర్చుల నివారణ బిల్లు 2016ను ప్రవేశపెట్టేందుకు ఆమె చొరవచూపిస్తున్నారు.

దీని ప్రకారం..ఏ పెళ్లి అయినా ఖర్చులు రూ.5లక్షలలోపే ఉండాలి. రూ.5లక్షలకు మించిన పెళ్ళి జరిగితే మాత్రం..పెళ్లివారు..ఖర్చు చేసిన నగదులో 10శాతం మేర ప్రభుత్వానికి చెల్లించాలి. అలా చెల్లించిన మొత్తం...పేద కుటుంబాల్లోని యువతుల పెళ్లిళ్లకు ప్రభుత్వం వినియోగిస్తుంది. అంతేకాదు పెళ్లి జరిగిన 60రోజుల్లో ఆ పెళ్లిని ప్రభుత్వం వద్ద రిజిస్ట్రేషన్ చేయించాలి.

‘‘ఇద్దరు వ్యక్తుల మధ్య జరిగే ఒప్పందానికి ఎంతో ప్రాధాన్యత ఇవ్వాలి. కానీ దురదృష్టవశాత్తు ఈరోజుల్లో పెళ్లి అంటే తమను తాము గొప్పగా చెప్పుకోవడానికి..తమ అంతస్థులు నలుగురికి ప్రకటించడానికి ఉపయోగపడుతోంది. దాంతో పోటీలు పడి ఖర్చు చేస్తున్నారు’’ అని రంజిత్ చెబుతున్నారు.

తమ హోదా, సంపదను నలుగురికి చెప్పడానికి జరుగుతున్న ఈ పెళ్లిళ్ల వల్ల నిరుపేదలు సామాజిక ఒత్తిడికి గురవుతున్నారని...సమాజంలో జరిగే ఇలాంటి వాటిపై నియంత్రణ ఉండాలని ఆమె అంటున్నారు.