కర్ణాటకలో బీజేపీ ఓటమి సంపూర్ణం..!

కర్ణాటకలో భారతీయ జనతా పార్టీ ఓటమి సంపూర్ణమైంది. అస్పస్టమైన ఫలితాలతో అరకొర బలంతో ముందుగా ప్రభుత్వాన్ని ఏర్పాటు చేసి భంగపడిన భారతీయ జనతా పార్టీ, ఇప్పుడు కుమారస్వామి విశ్వాస పరీక్ష విషయంలో కూడా ఒక విధంగా చేతులు ఎత్తేసింది. బీజేపీ వాళ్లు స్పీకర్ పదవికి పోటీకి దిగి, నామినేషన్‌ను ఉపసంహరించుకోవడం కూడా గమనించాల్సిన అంశం. విశ్వాస పరీక్ష సమయంలో అసెంబ్లీ నుంచి వాకౌట్ చేయడం ద్వారా భారతీయ జనతా పార్టీ కర్ణాటకలో పూర్తిగా ఓడిపోయిందని చెప్పకతప్పదు.

ప్రజల చేతుల్లో కన్నా కాంగ్రెస్, జేడీఎస్‌ల మంత్రాంగంతో భారతీయ జనతా పార్టీ అక్కడ ఓడిపోయింది. కర్ణాటక అసెంబ్లీ సాధారణ ఎన్నికల్లో బీజేపీకి మంచి ఆదరణే కనిపించింది. 222 సీట్లకు గానూ 104 సీట్లలో నెగ్గి భారతీయ జనతా పార్టీ సింగిల్ లార్జెస్ట్ పార్టీగా నిలిచింది. కౌంటింగ్‌లో ఒక దశలో మినిమం మెజారిటీ సీట్లలో ముందంజలో నిలిచిన బీజేపీ చివరకు వెనుకబడింది. 6,301 ఓట్ల మొత్తంతో బీజేపీ ఎనిమిది సీట్లను కోల్పోవడం విశేషం. అయితే బీజేపీ మెజారిటీకి 9 సీట్ల దూరంలో నిలవడంతో కాంగ్రెస్, జేడీఎస్‌లు అలర్ట్ అయ్యాయి.

కూటమిగా ఏర్పడి ప్రభుత్వ ఏర్పాటుకు పావులు కదిపాయి. అక్కడకూ గవర్నర్ బీజేపీకే అవకాశం ఇచ్చినా ఉపయోగం లేకపోయింది. యడ్యూరప్ప ప్రభుత్వం నిలబడలేదు. 55 గంటల్లోనే ఆయన రాజీనామా చేయాల్సి వచ్చింది. ఎమ్మెల్యేలతో క్యాంపును నిర్వహించడంలో కాంగ్రెస్ నేతలు విజయవంతం అయ్యారు. అక్కడే కాంగ్రెస్ పార్టీ, జేడీఎస్‌లు మొదటి విజయం సాధించాయి.

ఆ పార్టీలు తమ ఎమ్మెల్యేలను పూర్తిగా గ్రిప్‌లో పెట్టుకోవడంతో చేసేది లేక యడ్యూరప్ప విశ్వాస పరీక్షను ఎదుర్కొనకుండానే రాజీనామా చేశారు. ఇక వ్యూహాత్మకంగా కుమారస్వామిని సీఎం సీట్లో కూర్చోబెట్టిన కాంగ్రెస్ తమ వారి చేత త్యాగాలు చేయించి ప్రభుత్వాన్ని నిలబెట్టుకుంటోంది. కుమారస్వామి విశ్వాస పరీక్ష సమయంలో ఆఖరి వరకూ ఉండకుండా బీజేపీ వాళ్లు వాకౌట్ చేసేశారు. తద్వారా ఇక తమకు అవకాశాలు లేవని వారే స్పష్టం చేసినట్టుగా అయ్యింది. జేడీఎస్, కాంగ్రెస్‌లది అనైతిక పొత్తు అని బీజేపీ ధ్వజమెత్తింది. ఎలాగైతేనేం సాంకేతికంగా ఈ ప్రభుత్వం ఏర్పడింది. బీజేపీ ప్రస్తుతానికి ఓడిపోయింది. అయితే సంకీర్ణ ప్రభుత్వంలో లుకలుకలు మొదలైతే మాత్రం బీజేపీ బ్యాక్ అనిపించుకోవడం ఖాయం!