‘లవ్ జీహాద్‌’కు కారణం అదేనట!

బీజేపీ నేతలు అనవసరంగా నోరుజారి విమర్శలను, వివాదాలను కొనితెచ్చుకోవద్దంటూ సాక్షాత్తు ప్రధాని నరేంద్ర మోదీ హెచ్చరించినా, ఆ పార్టీ నాయకులు మాత్రం చెవికెక్కించుకోవడంలేదు. తాజాగా బాల్య వివాహాలకు అనుకూలంగా మధ్యప్రదేశ్‌‌కు చెందిన ఓ ఎమ్మెల్యే చేసిన వ్యాఖ్యలపై ప్రతిపక్షాలు మండిపడుతున్నాయి. అగర్ మాల్వా‌కు చెందిన బీజేపీ ఎమ్మెల్యే గోపాల్ పర్మార్ ఈ వివాదాస్పద వ్యాఖ్యలు చేశారు. ‘లవ్‌ జిహాద్‌’ లాంటి ఘటనలను నియంత్రించడానికి బాల్య వివాహాలను ప్రోత్సహించాలని, ఇలాంటి ఘటనలకు ఆలస్యంగా వివాహం చేసుకోవడమే కారణమని వ్యాఖ్యానించారు.

‘తల్లిదండ్రులు తమ పిల్లలకు చిన్నప్పుడే పెళ్లిళ్లను నిశ్చయించాలని.. అలాంటి బంధాలే దీర్ఘకాలం ఉంటాయని పేర్కొన్నారు. వివాహానికి 18 ఏళ్ల వయసును చట్టబద్దం చేయడం ఓ వ్యాధి లాంటిదని ఆయన పేర్కొన్నారు. 18 ఏళ్లు పూర్తవగానే యువతులు పారిపోతున్నారని, నేరస్థులు, మోసగాళ్లు పాఠశాల బాలికలను లక్ష్యంగా చేసుకొని వారిని ఉచ్చులో పడేస్తున్నారని అన్నారు. బాలికలు కౌమర దశకు చేరుకోగానే వారి మనసు ఇతర అంశాలపైకి మళ్లుతోందని.. కాబట్టి తల్లిదండ్రులు అప్రమత్తంగా ఉండాలని ఆయన కోరారు.

‘చిన్నతనంలోనే వివాహాలను నిశ్చయిస్తే, పిల్లలు తమకు పెళ్లి నిశ్చయమైందనే భావనతో ఎలాంటి తప్పుడు నిర్ణయాలు తీసుకోలేరని, నేటి కాలంలో విడాకులు సర్వసాధారణమైపోయానని’ పర్మార్ తన వ్యాఖ్యలను సమర్థించుకునే ప్రయత్నం చేశారు. సరైన సమయంలో వివాహాలు జరగకపోతే వారు తప్పుడు దారిలో నడుస్తున్నారని... లవ్‌ జిహాద్‌ లాంటి ఘటనలు చోటుచేసుకుంటున్నాయని అన్నారు. కుటుంబాలతో కొందరు మోసగాళ్లు స్నేహపూర్వకంగా మెలుగుతున్నట్టు నటిస్తూ ఆ ఇంట్లోని మహిళలపై లైంగిక దాడికి పాల్పడుతున్న ఘటనలు కూడా తరచూ చోటుచేసుకుంటున్నాయని పేర్కొన్నారు. పర్మార్ వ్యాఖ్యలపై ప్రతిపక్షాలు, సామాజిక కార్యకర్తలు మండిపడుతున్నారు. ఆయన తన వ్యాఖ్యలను వెనక్కి తీసుకోవాలని పలు సంఘాలు డిమాండ్‌ చేస్తున్నాయి.