ముందస్తు ఎన్నికలకు సిద్ధమైన గుజరాత్!?

ఉత్తర్ ప్రదేశ్ అసెంబ్లీ ఎన్నికల్లో ఘనవిజయం సాధించిన బీజేపీ...అన్ని రాష్ట్రాల్లో పాగా వేసేందుకు వ్యూహ రచన చేస్తోంది. మొన్న జరిగిన ఐదు రాష్ట్రాల అసెంబ్లీ ఎన్నికల్లో నాలుగు రాష్ట్రాల్లో బీజేపీ ప్రభుత్వాన్ని ఏర్పాటు చేసింది. ఉత్తర్ ప్రదేశ్ వంటి అతి పెద్ద రాష్ట్రంలో 403 ఎమ్మెల్యే స్థానాలకు 325 సీట్లు సాధించి ‘బాహుబలి’గా నిలిచింది. ప్రధానమంత్రి నరేంద్ర మోదీ చరిష్మాతో ఈ రాష్ట్రంలో భారీ విజయం సాధ్యమైంది.

ఇప్పుడు ఇదే ఊపుతూ అన్ని రాష్ట్రాల్లో కమలం జెండా పాతాలని కమలనాథులు ఉవ్విళ్లూరుతున్నారు.

ఈ నేపథ్యంలో ఈ యేడాది డిసెంబర్ లో జరుగనున్న గుజరాత్ అసెంబ్లీకి ముందస్తు ఎన్నికలు జరపాలని బీజేపీ కసరత్తు ప్రారంభించినట్లు ఊహాగానాలు వినిపిస్తున్నాయి. గుజరాత్ బీజేపీ నేతలు ‘మిషన్ 150’పేరుతో ముందుకు కదులుతున్నారు.

182 అసెంబ్లీ స్థానాలున్న గుజరాత్ అసెంబ్లీ వరుసగా 19ఏళ్లుగా బీజేపీ అధికారాన్ని దక్కించుకుంటూ వస్తోంది. మోదీ పీఎం అయ్యేవరకు గుజరాత్ కు నాలుగు సార్లు సీఎంగా వ్యవహారించారు. ప్రస్తుతం గుజరాత్ అసెంబ్లీ బీజేపీకి 123 ఎమ్మెల్యేల బలం ఉంది. వచ్చే ఎన్నికల్లో ఈ సంఖ్యను 150కి పెంచాలని పార్టీ నేతలు పకడ్బందీగా ప్రణాళిక రచిస్తున్నారు.

నోట్లరద్దు, పీవోకేలో తీవ్రవాదులపై జరిపిన సర్జికల్ దాడులు, ఇతరత్రా అంశాలన్ని మోదీకి, కేంద్ర ప్రభుత్వానికి కలిసొస్తున్నాయని బీజేపీ నేతలు ప్రగాఢంగా విశ్వసిస్తున్నారు. అందుకే యూపీలో భారీ విజయం నమోదు చేశామని..ఇదే ఊపులో దేశమంతటా విస్తరిస్తామని అంటున్నారు.

‘‘దేశవ్యాప్తంగా మోదీ ప్రభంజనం కనిపిస్తోంది. ఎన్నికలు ఎప్పుడు జరిగినా ఎదుర్కొనేందుకు మేం సిద్ధం. ముందస్తు ఎన్నికలు జరిగినా 150 సీట్లకు పైగా సాధిస్తాం’’ అని గుజరాత్ సీఎం విజయ్ రుపానీ ధీమా వ్యక్తం చేస్తున్నారు.

మోదీకి లభిస్తోన్న ఆదరణతో మరో ఐదేళ్లపాటు అధికారంలో ఉండటం, దాని ప్రభావం ఇతర రాష్ట్రాల్లో చూపేలా చేయడమే తమ లక్ష్యం అంటున్న నేతలు.. సీఎం స్థాయి నేతలు సైతం ముందస్తు ఎన్నికలకు సిద్ధంగా ఉన్న నేపథ్యలో... ముందస్తు ఎన్నికలు జరిగినా ఆశ్చర్యపడాల్సిన అవసరం లేదంటున్నారు విశ్లేషకులు.