కోల్‌కతాలో బీజేపీ కార్యాలయంపై దాడి

పశ్చిమబెంగాల్‌లో రాజకీయాలు ఉద్రిక్త రూపం దాలుస్తున్నాయి. తృణమూల్ కాంగ్రెస్ (టీఎంసీ) - బీజేపీల మధ్య విబేధాలు భగ్గుమంటున్నాయి. టీఎంసీకి చెందిన ఇద్దరు ఎంపీలను సీబీఐ అరెస్టు చేసిన సంగతి తెలిసిందే. దీనిపై టీఎంసీ వర్గాలు భగ్గుమన్నాయి. కోల్‌కతాలోని బీజేపీ ప్రధానకార్యాలయపై దాడికి దిగాయి. రాళ్లు విసిరాయి, అక్కడున్న వాహనాలు ధ్వంసం చేశాయి. లోపలికి చొచ్చుకెళ్లేందుకు ప్రయత్నించగా పోలీసులు అడ్డుకున్నారు. దీంతో రెచ్చిపోయిన టీఎంసీ కార్యకర్తలు వారిపై రాళ్ల దాడికి దిగారు. పోలీసులు లాఠీలకు పనిచెప్పారు. కాసేపు అక్కడ ఉద్రిక్త వాతావరణం చోటుచేసుకుంది.

రూ.17 వేల కోట్ల విలువైన రోజ్ వ్యాలీ చిట్ ఫండ్ సంస్థ చేసిన అవినీతిలో టీఎంసీకి చెందిన ఇద్దరు ఎంపీల హస్తం ఉందని సీబీఐ పేర్కొంది. అందుకే వారిద్దరిని అరెస్టు చేసినట్టు తెలిపింది. అయితే టీఎంసీ అధినేత్రి మమతా బెనర్జీ మాత్రం తాను నోట్ల రద్దును తీవ్రంగా వ్యతిరేకిస్తుండడంతోనే మోడీ ప్రభుత్వం తమపై కక్ష కట్టిందని పేర్కొన్నారు. అందుకే తన పార్టీ ఎంపీలను అన్యాయంగా అరెస్టు చేస్తున్నారని అన్నారు. అయినా నోట్ల రద్దుపై తన పోరాటం ఆపనని ప్రకటించారు. ఎంపీల అరెస్టు విషయమై చట్టబద్ధంగా పోరాటం చేస్తానని కూడా చెప్పారు. కోర్టులోనే తేల్చుకుంటామని తెలిపారు.