Delhi: రూ.150 ఇవ్వలేదని తండ్రి హత్య

దేశ రాజధాని ఢిల్లీలో దారుణం చోటుచేసుకుంది. రూ.150 ఇవ్వలేదని ఆగ్రహించిన 17ఏళ్ల యువకుడు తండ్రిపై కత్తితో దాడి చేసి హతమార్చాడు. ఈ ఘటన దిల్లీలోని న్యూ అశోక్‌నగర్‌లో జరిగింది. సమాచారం తెలుసుకున్న పోలీసులు సంఘటనా స్థలానికి చేరుకుని వివరాలు సేకరించారు. మృతుడిని హజారీ ముఖియా(42)గా గుర్తించారు.తమ కుమారుడు 150 రూపాయలు అడిగితే తన భర్త లేదని చెప్పాడని దీంతో ఇద్దరి మధ్య తీవ్ర వాగ్వాదం జరిగిందని మృతుడి భార్య పోలీసులకు తెలిపింది. ఆ తర్వాత ఆగ్రహంతో తన కొడుకు తండ్రిని కత్తితో అనేకసార్లు పొడిచి పారిపోయాడని చెప్పింది. తన భర్తను ఆస్పత్రికి తరలించగా అప్పటికే ప్రాణాలు కోల్పోయినట్లు డాక్టర్లు చెప్పారని వెల్లడించింది. దీనిపై కేసు నమోదు చేసుకున్న పోలీసులు నిందితుడి కోసం గాలింపు చేపట్టి అదుపులోకి తీసుకున్నారు. నిందితుడు మైనర్ కావడంతో జువైనల్ హోమ్‌కు తరలించారు.