బీఎంసీ ఎన్నికలు: మొదలైన కౌంటింగ్

ఈ నెల 21న జరిగిన బృహాన్‌ముంబై మునిసిపల్ కార్పోరేషన్(బీఎంసీ) ఎన్నికలకి నేటి ఉదయం 10 గంటలకి కౌంటింగ్ ప్రారంభమైంది. మహారాష్ట్రలోని మరో 9 నగరపాలిక సంస్థలకి అదే రోజు జరిగిన ఎన్నికలకి కౌంటింగ్ కూడా నేడే జరుగుతున్నప్పటికీ... ఆ రాష్ట్ర రాజధాని అయిన బీఎంసీ ఎన్నికల ఫలితంపైనే అందరి దృష్టి కేంద్రీకృతమై వుంది. అందుకు కారణం ముంబై కేవలం దేశ వాణిజ్య రాజధాని అవడం మాత్రమే ఓ కారణం అని కాదు.. శివసేన, బీజేపీలు విడిపోయిన తర్వాత ఎవరికి వారే విజయంపై ధీమా వ్యక్తంచేస్తూ ఒంటరిగా పోటీ చేస్తున్న ఎన్నికలు కూడా ఇవే కావడం అందుకు మరో కారణం.

మొత్తం 227 స్థానాలకి జరిగిన ఈ ఎన్నికల్లో శివసేన, బీజేపీ, కాంగ్రెస్, ఎన్సీపీలు హోరాహోరీగా తలబడుతున్నాయి. ఇక్కడ చాలా స్థానాల్లో శివసేన, బీజేపీలు హాట్ ఫేవరేట్లుగా బరిలోకి దిగాయి. ఉదయం 11 గంటల సమయానికి శివసేన 13 స్థానాల్లో, బీజేపీ 8 స్థానాల్లో, కాంగ్రెస్ 2 స్థానాల్లో ముందంజలో వున్నాయి. అంతిమంగా ఆసియాలోనే అతి పెద్ద, సంపన్నమైన మునిసిపల్ కార్పొరేషన్‌లలో ఒకటిగా గుర్తింపున్న బీఎంసీ మేయర్ పీఠం ఎవరికి దక్కనుంది అనేది ఇవాళ తేలిపోనుంది.