కోసీ నదిలో బోటు మునక.. 8 మంది మృతి

నదిలో పడవ మునిగిన ఘటనలో 8 మంది మృత్యువాతపడ్డారు. బీహర్ రాష్ట్రంలోని భాగల్‌పుర్‌లో ఈ విషాదం చోటు చేసుకుంది. కోసీ నదిలో విహారానికి వెళ్లిన 15 మందితో కూడిన పర్యాటక బోటు ప్రమాదవశాత్తూ మునిగిపోయినట్లు తెలుస్తోంది. ఈ ప్రమాదం నుంచి ఏడుగురిని రెస్క్యూ టీం సురక్షితంగా ఒడ్డుకు తీసుకువచ్చింది. రెస్క్యూ ఆపరేషన్ కొనసాగుతోంది. ఘటనకు సంబంధించిన పూర్తి వివరాలు తెలియాల్సి ఉంది.

బీహార్‌లో గత జనవరి 31న గంగానదిలోనూ బోటు మునిగిన ఘటనలో అయిదుగురు దుర్మరణం పాలైన విషయం తెలిసిందే. పాట్నాకు సమీపంలోని ఫతువా వద్ద ఈ ప్రమాదం జరిగింది. ఈ ప్రమాదంలో మృతులంతా మహిళలే. మాఘ పూర్ణిమ సందర్భంగా పవిత్ర గంగానదిలో పుణ్యస్నానాలు ఆచరించడానికి భక్తులు పెద్ద సంఖ్యలో ఫతువాలోని మస్తానా ఘాట్‌కు చేరుకున్నారు. అనంతరం బోటింగ్ కోసం అనేక మంది పర్యాటకులు క్యూ కట్టారు. ఈ సమయంలో విషాదం చోటు చేసుకుంది.