చైనాతో జరిగిన చర్చల వివరాలను వెల్లడించిన ఆర్మీ.. సారాంశమిదే!

సరిహద్దుల్లో ఉద్రిక్తతల నేపథ్యంలో భారత్, చైనాల మధ్య సోమవారం రెండో దఫా చర్చలు జరిగిన విషయం తెలిసిందే. ఈ చర్చలకు సంబంధించిన వివరాలను సైన్యం మంగళవారం వెల్లడించింది. ఇరు దేశాల లెఫ్టినెంట్ జనరల్స్ స్థాయి అధికారుల మధ్య చూశూల్‌లోని మోల్డోలో 10 గంటలపాటు చర్చలు జరిగినట్టు తెలిపింది. తూర్పు లడఖ్‌లోని ఏర్పడిన ఉద్రిక్తతలను స్నేహపూర్వక, సానుకూల, నిర్మాణాత్మక వాతావరణం ద్వారా పరిష్కరించుకోవాలని ఇరు సైన్యాలూ నిర్ణయించినట్టు పేర్కొన్నాయి. సాధారణ పరిస్థితిని తీసుకొచ్చేందుకు ఏకాభిప్రాయానికి వచ్చాయని వివరించారు. ఉద్రిక్తత ప్రాంతం నుంచి ఇరు దేశాలూ సైన్యాలను వెనక్కు మళ్లించాలని నిర్ణయించినట్టు స్పష్టం చేశాయి.

నిర్ణయించుకున్న ప్రకారం తప్పకుండా సమన్యాయం చేసుకోవాలని నిర్ణయం తీసుకున్నట్టు తెలిపాయి. తూర్పు లడఖ్‌లోని అన్ని ప్రాంతాల నుంచి సైన్యాలను ఉపసంహరించుకోవాలని నిర్ణయించినట్టు ఆర్మీ వర్గాలు వెల్లడించాయి. వివాదాస్పద ప్రాంతాల్లో నెలకున్న ప్రతిష్టంభనపై విస్తృత చర్చ జరిగిందని పేర్కొన్నాయి. బలగాల ఉపసంహరణకు ఇరు దేశాలు అంగీకారానికి వచ్చాయి. మోల్డోలో తీసుకున్న నిర్ణయాలను ఇరు దేశాలూ తప్పకుండా అమలుచేస్తాయని ఆర్మీ తెలిపింది.

మరోవైపు, చైనా విదేశాంగ శాఖ సైతం మంగళవారం కీలక ప్రకటన చేసింది. సరిహద్దుల్లో ఏర్పడిన ఉద్రిక్తతలను చల్లార్చి, యథాతథ స్థితిని కొనసాగించడానికి భారత్, చైనాలు అంగీకరించాయని తెలిపింది. గాల్వన్ లోయ వద్ద జరిగిన ఘర్షణతో ఏర్పడిన ఉద్రిక్తతలను చర్చల ద్వారా పరిష్కరించుకోవాలనే ఏకాభిప్రాయానికి వచ్చామని వెల్లడించింది. అయితే, గాల్వన్ ఘర్షణల్లో 40 మంద వరకు తమ సైనికులు ప్రాణాలు కోల్పోయారని వస్తున్న వార్తల్లో నిజంలేదని చైనా విదేశాంగ శాఖ అధికార ప్రతినిధి జూ లింజియాన్ ఖండించారు.