ఆ బ్రాహ్మణులకు ఎస్సీ రిజర్వేషన్ వర్తింపు

షెడ్యూల్డు కులాల (ఎస్సీ)కు చెందిన కుటుంబాలు, వ్యక్తులు దత్తత తీసుకున్న బ్రాహ్మణులకు ఎస్సీ రిజర్వేషన్లు వర్తిస్తాయని, అలా దత్తత పొందిన పిల్లలకు ఎస్సీ కోటా వర్తిస్తుందని పంజాబ్ హర్యానా హైకోర్టు స్పష్టం చేసింది.

ఎస్సీ కుటుంబాలు అధికారికంగా దత్తత తీసుకున్న బ్రాహ్మణ పిల్లలకు రిజర్వేషన్ సౌకర్యాన్ని ఎవరూ అడ్డుకోలేరని ఉన్నత న్యాయస్థానం ఓ కేసులో తీర్పునిచ్చింది.

పంజాబ్ లోని సంగ్రూర్ చెందిన రతేజ్ భారతి అనే వ్యక్తి ఎస్సీ కోటాలో దక్కిన టీచర్ ఉద్యోగంలో 20ఏళ్లుగా కొనసాగుతున్నారు. ఆయన బ్రాహ్మణుడని, ఎస్సీ రిజర్వేషన్ వర్తించదని ఫిర్యాదు రావడంతో పంజాబ్ ప్రభుత్వం రతేజ్ ను ఉద్యోగంలో నుంచి తొలగించింది. దీంతో ఆయన హైకోర్టును ఆశ్రయించారు.

భారతి బయోలాజికల్ తండ్రి తేజ్ రామ్ (బ్రాహ్మణుడు) 1977లో ఎస్సీ సామాజిక వర్గానికి చెందిన చాంద్ సింగ్, భానో దంపతులకు దత్తత ఇచ్చాడు. గ్రామ పంచాయతి, ఇరు కుటుంబ సభ్యుల సమక్షంలో ఈ దత్తత కార్యక్రమం జరిగింది.