వరుడి నడక చూసి..పెళ్లి ఆపేసిన వధువు

వరుడు తన అంగ వైకల్యాన్ని దాచి వివాహం చేసుకునేందుకు ప్రయత్నించడంతో ఆగ్రహించిన వధువు ఆఖరి నిమిషంలో పెళ్లిని ఆపివేయించిన ఘటన ఉత్తర్‌ప్రదేశ్‌లోని కన్నౌజ్‌లో చోటు చేసుకుంది. వివాహ వేదిక వద్ద పెద్ద గొడవ జరగడంతో.. వధూవరుల కుటుంబ సభ్యులు పోలీసుల్ని ఆశ్రయించారు. దీంతో.. విషయం వెలుగులోకి వచ్చింది.

పోలీసులు, స్థానికుల కథనం ప్రకారం.. ఉధారణ్ గ్రామానికి చెందిన యోగేష్‌కి ఇటీవల రూబీతో నిశ్చితార్థం జరిగింది. అయితే.. ఆ సమయంలో యోగేష్‌కి కొద్దిగా అంగ వైకల్యం ఉందనే విషయాన్ని రూబీ కుటుంబ సభ్యులకి వారు చెప్పకుండా గోప్యంగా ఉంచారు. దీంతో.. గత ఆదివారం వివాహానికి ముహూర్తం ఖరారవగా.. వరుడు వివాహ వేదిక వద్దకు కుంటుతూ నడిచి రావడాన్ని వధువు గమనించింది. వెంటనే ఈ విషయమై వరుడి కుటుంబ సభ్యుల్ని నిలదీయగా.. వారు వాస్తవాన్ని దాచినట్లు అంగీకరించారు. దీంతో.. ఆగ్రహించిన వధువు.. తాను ఈ పెళ్లి చేసుకోనని తెగేసి చెప్పేసింది.

పెద్ద కుమారుడ్ని వివాహం చేసుకోకపోయినా.. కనీసం అతడి తమ్ముడ్ని పెళ్లి చేసుకోవాలని యోగేష్‌ కుటుంబ సభ్యులు ఓ ప్రతిపాదనని తీసుకురాగా.. దానినీ వధువు తిరస్కరించింది. దీంతో.. ఇరు కుటుంబాల మధ్య కాసేపు వాదోపవాదనలు జరగ్గా.. పోలీసులు చొరవ తీసుకుని ఇరు వర్గాల మధ్య రాజీ కుదిర్చారు. దీంతో.. నగలు, బహుమతులు పంచుకుని ఎవరి ఇళ్లకు వారు వెళ్లిపోయారు.