‘రోహింగ్యాలను తిరిగి పంపుతాం, అరెస్ట్‌ చేయం’

మాయన్మార్‌కు చెందిన రోహింగ్యాలను దేశం నుంచి వెనక్కు పంపడమే తమ విధానమని, వారిని అరెస్ట్ చేయడం లక్ష్యం కాదని బోర్డర్ సెక్యూరిటీ ఫోర్స్ చీఫ్ కేకే శర్మ వ్యాఖ్యానించారు. దేశంలోకి రోహింగ్యాల అక్రమవలస సంక్లిష్టంగా మారిందని వ్యాఖ్యానించిన ఆయన, అక్రమంగా చొరబడ్డవారిని వెనక్కు పంపడమే తమ కర్తవ్యమని, అరెస్టు చేయమని పునరుద్ఘాటించారు. ఒకవేళ రోహింగ్యాలను అరెస్టు చేస్తే, వారి గుర్తింపు కోసం కొత్త బాధ్యతలు తీసుకోవాలి... కాబట్టి వెనక్కు పంపడమే సమస్యకు పరిష్కారమని శర్మ తెలిపారు. దేశంలోని వివిధ ప్రాంతాల్లో సుమారు 36,000 వేల మంది రోహింగ్యాలు ఉన్నారని తెలియజేశారు.

ఈ ఏడాది ఇప్పటిదాకా బీఎస్ఎఫ్ గుర్తించిన 87 మంది రోహింగ్యాలలో అక్టోబరు 31 నాటికి 76 మందిని బంగ్లాదేశ్‌కు తిరిగి పంపామని తెలిపారు. విశ్వసనీయ సమాచారం ప్రకారం బంగ్లాదేశ్‌లో 9 నుంచి 10 లక్షల మంది రోహింగ్యా శరణార్థులు ఉన్నట్లు బీఎస్ఎఫ్ అధికారులు అంచనా వేస్తున్నారు. వీరిలో చాలా మంది కాక్స్ బజార్ ప్రాంతంలో తలదాచుకుంటున్నారు. బంగ్లాదేశ్ నుంచి వీళ్లు మనదేశంలోకి చొరబడకుండా బోర్డర్ సెక్యూరిటీ దళానికి చెందిన సైనికులు అత్యంత సమస్యాత్మక ప్రాంతమైన భారత్-బంగ్లా సరిహద్దుల్లో కాపలా కాస్తున్నారని తెలిపారు. ఎవరైనా చొరబాటుకు ప్రయత్నిస్తే ప్రవేశించకుండా అడ్డుకుంటున్నారని అన్నారు.

అలాగే బంగ్లాదేశ్‌లో తలదాచుకుంటున్న రోహింగ్యా శరణార్థుల్లో చాలా మంది సంతోషంగా లేరని, అందుకే వారు భారత్‌లో ప్రవేశించి, ఇక్కడే ఏదో పనిచేసుకుని, మంచి జీవితాన్ని కోరుకుంటున్నారని శర్మ పేర్కొన్నారు. రోహింగ్యాలను సరిహద్దులను దాటించడానికి చాలా మంది ఏజెంట్లు ప్రయత్నిస్తున్నారన్న సమాచారంతో మరింత అప్రమత్తమయ్యామని తెలిపారు. అందుకే అదనంగా మరో ఐదు బెటాలియన్లను ఇండో-బంగ్లా సరిహద్దుల్లో మెహరించి, వీరి చొరబాట్లను అడ్డుకుంటామని తెలియజేశారు.