Odisha Bus Accident: వంతెనపై నుంచి లోయలోపడ్డ బస్సు

ఒడిశాలోని కటక్‌లో పెను విషాదం చోటుచేసుకుంది. మహానది వంతెనపై నుంచి వెళ్తున్న ట్రావెల్స్‌ బస్సు అదుపుతప్పి నదిలో పడిపోయింది. 30 మంది ప్రయాణికులతో వెళ్తున్న బస్సు జగత్‌పూర్‌ సమీపంలోని మహానది బ్రిడ్జి మీదకు రాగానే అదుపుతప్పి లోయలో పడిపోయింది. ఈ ప్రమాదంలో ఏడుగురు మృతిచెందారని, మృతుల సంఖ్య పెరిగే అవకాశం ఉందని అధికారులు చెబుతున్నారు. ఎద్దును ఢీకొట్టి బస్సు అదుపుతప్పడంతో ప్రమాదం జరిగిందని స్థానికులు చెబుతున్నారు.

ప్రమాదం సమాచారం అందుకున్న అధికారులు అప్రమత్తమయ్యారు. రెస్క్యూ సిబ్బంది, అగ్నిమాపక సిబ్బంది, పోలీసులు ఘటనా స్థలానికి చేరుకుని సహాయక చర్యలు చేపట్టారు. అంబులెన్స్‌లను సైతం వంతెన వద్ద సిద్ధంగా ఉంచారు. బస్సు నుంచి బయటకు తీసిన వారికి ప్రాథమిక చికిత్స అందిస్తున్నారు. డ్రైవర్ నిర్లక్ష్యం కారణంగానే ప్రమాదం జరిగిందని పోలీసులు భావిస్తున్నారు.
బస్సు ప్రమాదంపై ఒడిశా సీఎం నవీన్ పట్నాయక్ దిగ్భ్రాంతి వ్యక్తం చేశారు. సహాయక చర్యలు ముమ్మరం చేయాలని ఉన్నతాధికారులను ఆదేశించారు. సహాచక చర్యలు కొనసాగుతున్నాయి. బస్సు ప్రమాదం ఘటనపై విచారణకు ఆదేశించారు.