కాసేపట్లో పెళ్లి... ఇంతలోనే విషాదం

ఆ ఇంట్లో పెళ్లి సందడి కనిపిస్తోంది. బంధువులతో కళకళలాడుతోంది. మరికొద్దిగంట్లలోనే వివాహ వేడుక. ఇంతలోనే అనుకొని విషాదం... పెళ్లి పీటలెక్కాల్సిన వరుడు విగతజీవిగా మారిపోయాడు. భాజాభజంత్రీలు మోగాల్సిన ఇంట్లో... చావు డప్పు మోగింది. యూపీలోని నోయిడాలో జరిగిన ఘటన తీవ్ర విషాదాన్ని నింపింది. నందోసి ప్రాంతానికి చెందిన నరేష్ పాల్ గాంగ్వర్ సివిల్ ఇంజినీర్. నోయిడాలోని సుఖిజా బిల్డర్స్‌లో పనిచేస్తున్న నరేష్‌కు షాజహాన్‌పూర్‌కు చెంది యువతితో పెళ్లి కుదిరింది. ఆదివారం సాయంత్రం పెళ్లి ముహూర్తం. మరి కొన్ని గంటల్లో పెళ్లి ముహూర్తం... ఈలోపే నరేష్‌కు ఫోన్ కాల్ వచ్చింది.


ఫోన్ రావడంతో ఇంట్లో నుంచి బయటకు వచ్చాడు. సిగ్నల్ సరిగా లేకపోవడంతో పక్కనే ఉన్న రైల్వే ట్రాక్ దగ్గరకు వెళ్లి ఫోన్ మాట్లాడుతున్నాడు. ఈ హడావిడిలో ట్రాక్‌పై ట్రైన్ వస్తున్న విషయాన్ని గమనించలేదు. ఇంతలోపే రాజ్యరాణి ఎక్స్‌ప్రెస్ అతడ్ని ఢీకొట్టింది. స్పాట్‌లోనే నరేష్ ప్రాణాలు కోల్పోయాడు. అతడి మృతితో పెళ్లి ఇంట విషాదం నెలకొనగా... తమకు అండగా ఉంటాడనుకున్న కొడుకు చనిపోయాడంటూ తల్లిదండ్రులు కన్నీళ్లు పెట్టుకున్నారు. పెళ్లి కోసమని వచ్చి ఇలా అంత్యక్రియల్లో పాల్గొనడం బాధగా ఉందని నరేష్ మిత్రులు ఆవేదన వ్యక్తం చేశారు.