కారులో సిగరెట్.. మంటల్లో డ్రైవర్!

కారులో సిగరెట్ తాగుతూ రయ్‌మంటూ దూసుకెళ్తున్నారా? అయితే, జాగ్రత్త!! మీరూ ఇలాంటి ప్రమాదంలో చిక్కుకోవచ్చు. ఉత్తరప్రదేశ్‌లోని ఫిలిబీత్‌లో ఓ డ్రైవర్ ప్రాణాపాయం నుంచి తృటిలో తప్పించుకున్నాడు. కారు నడుపుతూ సరదాగా సిగరెట్ తాగుదామని లైటర్ నొక్కగానే ఒక్కసారే భగ్గుమంటూ మంటలు చెలరేగాయి. ఈ హఠాత్ పరిణామానికి భీతిల్లిన కారు డ్రైవర్.. బయటకు రాలేకపోయాడు.

అటుగా వెళ్తున్న వాహనదారులు అతన్ని కారు నుంచి బయటకు తీశారు. అయితే, అప్పటికే డ్రైవర్ శరీరం 60 శాతానికి పైగా కాలిపోయింది. ప్రస్తుతం ఆసుపత్రిలో చికిత్స పొందుతున్న అతని పరిస్థితి చాలా విషమంగా ఉందని వైద్యులు తెలిపారు. కారులోని గ్యాస్ కిట్ లీకేజీ వల్లే ప్రమాదం జరిగిందని పోలీసులు తెలిపారు. డ్రైవర్‌ను సలీముద్దీన్‌గా గుర్తించినట్టు పేర్కొన్నారు.