Drug Trafficking ఇంటర్‌పోల్‌తో కలిసి సీబీఐ ‘ఆపరేషన్ గరుడ’... ఇక డ్రగ్స్ ముఠాలకు చుక్కలే!

దేశవ్యాప్తంగా ఆపరేషన్ గరుడ (Operation Garuda) పేరుతో సీబీఐ (CBI) సోదాలు నిర్వహిస్తోంది. మాదకద్రవ్యాల (Drugs) అక్రమ రవాణా ముఠాలపై చర్యల్లో భాగంగా ఇంటర్‌పోల్ (Interpol) సహకారంతో ఈ సోదాలను సీబీఐ నిర్వహిస్తోంది. డ్రగ్స్ ముఠాలకు చెందిన 170 మందిని ఇప్పటికే సీబీఐ అరెస్ట్ చేసి, పెద్ద మొత్తంలో డ్రగ్స్ స్వాధీనం చేసుకున్నట్టు సీబీఐ ప్రకటించింది. మొత్తం 125 కేసులు నమోదుచేసినట్టు తెలిపింది.పంజాబ్, ఢిల్లీ, హిమాచల్ ప్రదేశ్, మణిపూర్, మహారాష్ట్ర సహ పలు రాష్ట్రాలు పోలీసులు, నార్కోటిక్స్ కంట్రోల్ బ్యూరో (NCB) అధికారులతో కలిసి ఈ ప్రత్యేక ఆపరేషన్‌ను చేపట్టినట్టు పేర్కొంది. మొత్తం 6,600 అనుమానితులను తనిఖీ చేసినట్టు చెప్పింది. పరారీలో ఉన్న ఆరుగురు నిందితులు సహా దాదాపు 175 మందిని అదుపులోకి తీసుకున్నట్టు వెల్లడించింది. భారీ మొత్తంలో మత్తు పదార్థాలను కూడా స్వాధీనం చేసుకున్నామని తెలిపింది.

‘‘మాదకద్రవ్యాల అక్రమ రవాణాపై క్రిమినల్ ఇంటెలిజెన్స్ వేగవంతమైన మార్పిడి.. ఇంటర్‌పోల్ ద్వారా అంతర్జాతీయ అధికార పరిధిలో సమన్వయంతో కూడిన చట్టాన్ని అమలు చేయడం ద్వారా అంతర్జాతీయ అనుసంధానాలతో డ్రగ్స్ నెట్‌వర్క్‌లను విచ్ఛిన్నం చేయడానికి ఈ ఆపరేషన్ ప్రయత్నిస్తుంది’’ అని ప్రకటనలో సీబీఐ వివరించింది.

‘‘ఇంటర్‌పోల్, నార్కోటిక్స్ కంట్రోల్ బ్యూరో సన్నిహిత సమన్వయంతో ఈ అంతర్జాతీయ ఆపరేషన్ ద్వారా హిందూ మహాసముద్ర ప్రాంతంపై ప్రత్యేక దృష్టి సారించి, డ్రగ్స్,సైకోట్రోపిక్ పదార్థాల అక్రమ రవాణాను అడ్డుకోవడం ప్రారంభించాం.. అంతర్జాతీయ అనుసంధానంతో డ్రగ్ ట్రాఫికింగ్ నెట్‌వర్క్‌లకు అంతర్జాతీయ అధికార పరిధిలో చట్టం అమలకు సహకారం అవసరం’’ అని పేర్కొంది.