నీటి నిర్వహణకై హై లెవెల్ కమిటీ ఏర్పాటు

కేంద్ర ప్రభుత్వం కొత్తగా ఓ అత్యున్నత స్థాయి కమిటీని ఏర్పాటు చేసింది. ఈశాన్య భారతంలోని నీటి వనరులని మరింత మెరుగ్గా నిర్వహంచే దిశగా ఈ కమిటీ పనిచేయనుంది. నీతి ఆయోగ్ ఉపాధ్యక్షుడు ఈ కమిటీకి నేతృత్వం వహించనున్నారు. ఆగస్టు నెలలో అస్సాంలో వరదలు భీభత్సం సృష్టించిన సందర్భంగా గౌహతిలో పర్యటించిన ప్రధాని నరేంద్ర మోదీ అక్కడి పరిస్థితులని దృష్టిలో పెట్టుకుని ఈ కమిటీని ఏర్పాటు చేశారు.

ఈశాన్య భారతంలోని నీటి వనరుల ఆధారంగా హైడ్రో ఎలక్ట్రిక్ ఎనర్జీ ఉత్పత్తి, వ్యవసాయ అవసరాలు, బయో-డైవర్సిటీ కన్జర్వేషన్, అటవీ, మత్స్య సంపద, పర్యాటక రంగం అభివృద్ధి వంటి అంశాలపై ఈ కమిటీ దృష్టిసారించనుంది. ఈశాన్య భారత ప్రాంతాల అభివృద్ధి కోసం సంబంధింత శాఖ అధికార యంత్రాంగం సైతం ఈ కమిటీతో కలిసి పనిచేయనుంది.

2018 జూన్ నాటికి కమిటీ ఈ అంశాలపై అధ్యయనం పూర్తిచేసి సూచనలు, సలహాలతో కూడిన నివేదికను కేంద్రానికి అందజేయాల్సి వుంది. వరదల నేపథ్యంలో అస్సాం, మణిపూర్, అరుణాచల్ ప్రదేశ్ రాష్ట్రాల ముఖ్యమంత్రులతో సమీక్ష సమావేశం నిర్వహించిన సమయంలోనే ఈశాన్య భారతంలోని నీటి వనరుల నిర్వహణ కోసం ఓ అత్యున్నత స్థాయి కమిటీ ఏర్పాటు చేయనున్నట్టు అప్పట్లో ప్రధాని నరేంద్ర మోదీ ప్రకిటించారు. అప్పటి ప్రకటనను అనుసరిస్తూ తాజాగా కమిటీని ఏర్పాటు చేసింది కేంద్రం.