యజమానులు అద్దె అడగొద్దు.. రోడ్డెక్కితే క్వారంటైన్లో పెట్టండి: కేంద్రం

కరోనా వైరస్‌ను కట్టడి చేయడం కోసం మూడు వారాలపాటు లాక్‌డౌన్ ప్రకటించిన కేంద్రం.. రాష్ట్రాలకు కీలక ఆదేశాలు జారీ చేసింది. లాక్‌డౌన్‌ను మరింత పటిష్టంగా అమలు చేయాలని సూచించింది. కరోనాను నిలువరించడం కోసం ప్రజలందరి కోసం మూడు వారాలపాటు లాక్‌డౌన్‌ను పకడ్బందీగా అమలు చేయాలని పేర్కొంది. రాష్ట్రాలు, జిల్లాల సరిహద్దులను సీల్ చేయాలని కేంద్రం ఆదేశించింది. పట్టణాలు, హైవేల మీదకు ప్రజలు వెళ్లకుండా చూడాలని.. కేవలం సరుకులు రవాణా చేసే వాహనాలకు మాత్రమే అనుమతించాలని సూచించింది. పరిస్థితిని నిరంతరం సమీక్షించి.. తగిన చర్యలు తీసుకోవాలని కోరింది.

లాక్‌డౌన్ సమయంలో నిబంధనలను ఉల్లంఘించి ప్రయాణాలు చేసే వారిని 14 రోజులపాటు ప్రభుత్వ క్వారంటైన్ సెంటర్లలో క్వారంటైన్లో ఉంచాలని రాష్ట్రాలను కేంద్రం ఆదేశించింది.

లాక్‌డౌన్ పరిస్థితిని సమీక్షించడం కోసం రాష్ట్రాల చీఫ్ సెక్రటరీలు, డీజీపీలతో కేంద్ర కేబినెట్ కార్యదర్శి, హోం సెక్రటరీ ఆదివారం ఉదయం వీడియో కాన్ఫరెన్స్ నిర్వహించారు. ఈ సందర్భంగా క్వారంటైన్లో ఉన్నవారిని పరిశీలించడం కోసం రాష్ట్రాలకు కేంద్రం సూచనలు జారీ చేసింది. లాక్‌డౌన్ వేళ పని చేస్తున్న కార్మికులకు పూర్తి వేతనాలు అందేలా చూడాలని రాష్ట్రాలను ఆదేశించింది.

శ్రామికుల నుంచి యజమానులు ఇంటి అద్దె డిమాండ్ చేయొద్దని కేంద్రం స్పష్టం చేసింది. చిన్నపాటి పనులు చేసుకునే కార్మికులు, విద్యార్థులను ఇల్లు ఖాళీ చేయాలని బలవంతం చేస్తే చర్యలు తీసుకుంటామని హెచ్చరించింది.

Read Also: కరోనాపై ఇస్రో వార్.. రాకెట్ల తయారీని పక్కనబెట్టి..

పేదలు, అవసరం ఉన్న వారికి భోజనానికి, వసతికి తగిన ఏర్పాట్లు చేయాలని రాష్ట్రాలను కేంద్రం ఆదేశించింది. ఇందుకోసం ఎస్డీఆర్ఎఫ్ నిధులను వాడుకోవాలని సూచించింది. రాష్ట్రాల చీఫ్ సెక్రటరీలు, డీజీపీలతో కేంద్ర కేబినెట్ కార్యదర్శి, హోం శాఖ నిరంతరం టచ్‌లో ఉంటారని కేంద్రం తెలిపింది.

Must Read: ఇది ఏ తరహా లాక్‌డౌన్? కేంద్రంపై ఒవైసీ సంచలన వ్యాఖ్యలు