చిన్నారుల తల్లిదండ్రులకు అలర్ట్.. కేంద్రం కీలక ఆదేశాలు

విద్యార్థులు ఒకటో తరగతిలో చేరేందుకు కనీసం ఆరేళ్ల వయసు ఉండాలని కేంద్రం స్పష్టం చేసింది. ఈ మేరకు విద్యాశాఖ అన్ని రాష్ట్రాలు, కేంద్రపాలిత ప్రాంతాలకు ఆదేశాలు జారీ చేసింది. నూతన విద్యా విధానం ప్రకారం చిన్నారులకు మూడేళ్ల ప్రి స్కూల్ ఎడ్యుకేషన్‌తోపాటు ఒకటో తరగతి, రెండో తరగతి కలిపి ఫౌండేషనల్ స్టేజ్ ఐదేళ్లు ఉంటుంది. మూడు నుంచి 8 ఏళ్ల మధ్య వయసున్న చిన్నారులు ఈ ఐదేళ్లలో తమ వయసును బట్టి నేర్చుకుంటారు. ‘ప్రి స్కూల్ నుంచి రెండో తరగతి వరకు చిన్నారులు ఎలాంటి ఇబ్బంది లేకుండా నిరంతరాయంగా నేర్చుకోవడాన్ని నూతన విద్యావిధానం ప్రోత్సహిస్తుంది. అంగన్వాడీలు లేదా ప్రభుత్వ, ఎయిడెడ్, ప్రయివేట్, ఎన్జీవోలు నడిపే ప్రిస్కూల్ సెంటర్లలో చిన్నారులకు మూడేళ్ల నాణ్యమైన ప్రిస్కూల్ ఎడ్యుకేషన్ అందేలా ఇది చేస్తుంది’ అని విద్యాశాఖ అధికారి తెలిపారు.

ఒకటో తరగతిలో అడ్మిషన్ ఇచ్చే సమయంలో విద్యార్థి వయసు ఆరేళ్లు లేదా అంతకు మించి ఉండేలా చూడాలని రాష్ట్రాలు, కేంద్రపాలిత ప్రాంతాలకు కేంద్ర విద్యాశాఖ ఆదేశాలు జారీ చేసిందని ఆ అధికారి చెప్పారు. ఇప్పటికే కేంద్రీయ విద్యాలయాల్లో ఒకటో తరగతిలో ప్రవేశాలకు కనీసం ఆరేళ్ల వయసు ఉండాలనే నిబంధనను అమలు చేస్తున్నారు.

తెలంగాణతోపాటు అసోం, గుజరాత్, పుదుచ్చేరి, లడఖ్ లాంటి రాష్ట్రాల్లో ఐదో ఏట అడుగుపెట్టిన చిన్నారులకు ఒకటో తరగతిలో అడ్మిషన్ ఇచ్చేవారు. ఆంధ్రప్రదేశ్‌తోపాటు ఢిల్లీ, రాజస్థాన్, ఉత్తరాఖండ్, హర్యానా, కర్ణాటక, కేరళ తదితర రాష్ట్రాల్లో ఐదేళ్లు దాటితేనే ఒకటో తరగతిలో ప్రవేశాలు కల్పిస్తున్నారు.

నూతన విద్యావిధానం 2020 ప్రకారం.. పాఠశాల విద్యా విధానం 5+3+3+4 తరహాలో ఉంది. తొలి ఐదేళ్లలో.. మూడేళ్ల ప్రి స్కూల్ దశ ఉంటుంది. మూడు నుంచి ఆరేళ్లలోపు చిన్నారులు ఈ దశలో విద్యను అభ్యసిస్తారు. ఆరు నుంచి 8 ఏళ్ల మధ్య వయసున్న చిన్నారులు ఒకటి, రెండు తరగతులు చదువుతారు. విద్యాహక్కు చట్టం 2009 ప్రకారం 14 ఏళ్లలోపు పిల్లలందరికీ ఉచిత, నిర్బంధ విద్యను పొందే హక్కుంది.