కరోనాపై కేంద్రం సర్వే.. ప్రజల ఫోన్లకు ఈ నంబర్ నుంచి కాల్స్...

భారత ప్రభుత్వం కరోనా వైరస్ లక్షణాల విషయమై టెలిఫోనిక్ సర్వే చేపట్టనుంది. 1921 నంబర్ నుంచి దేశ ప్రజల ఫోన్ నంబర్లకు కాల్స్ రానున్నాయి. నేషనల్ ఇన్ఫర్మేటిక్స్ సెంటర్, మినిస్ట్రీ ఆఫ్ ఎలక్ట్రానిక్స్ అండ్ ఇన్ఫర్మేషన్ టెక్నాలజీ ఈ కార్యక్రమాన్ని చేపడుతున్నాయి. కరోనా వ్యాప్తి, లక్షణాలు తదితర అంశాలపై ప్రజలకు ఫోన్ చేసి సర్వే చేపట్టనున్నారు. ఈ సర్వే గురించి ప్రజలకు అవగాహన కల్పించాలని కేంద్రం రాష్ట్రాలను కోరింది.

ఇతర నంబర్ల నుంచి ఫోన్ చేసి ప్రజలను మోసే చేసే అవకాశం ఉందని కేంద్రం హెచ్చరించింది. 1921 నంబర్ నుంచి మాత్రమే కాల్ చేసి సర్వే చేపడతామనే విషయాన్ని ప్రజలు గుర్తుంచుకోవాలని ప్రభుత్వం తెలిపింది. కరోనా లక్షణాలు ఉన్నప్పటికీ.. కొందరు క్వారంటైన్‌కు భయపడి లక్షణాల విషయాన్ని బహిర్గతం చేయడం లేదు. ఇలాంటి వారి నుంచి సమాచారం సేకరించడానికి ఫోన్ సర్వే ఉపకరిస్తుందని భావిస్తున్నారు.
ఫోన్ సర్వేలోనైనా లక్షణాల గురించి బహిర్గతం చేస్తేనే వారికి కరోనా పరీక్షలు చేసే అవకాశం ఉంటుంది. పూర్తిగా ప్రజల సహకారం మీదే ఈ టెలిఫోనిక్ సర్వే ఆధారపడి ఉంటుంది.