ఐఏఎస్ అధికారి కుమార్తెపై వేధింపుల కేసు: వికాస్ అరెస్టు

ఐఏఎస్‌ అధికారి కుమార్తెను వెంబడించి వేధింపులకు గురిచేసిన కేసులో హర్యాణా బీజేపీ అధ్యక్షుడు సుభాష్‌ బరాలా కుమారుడు వికాస్‌ బరాలాను పోలీసులు ఎట్టకేలకు అరెస్టు చేశారు. సీసీటీవీ ఫుటేజ్‌లను పరిశీలించిన అనంతరం ఈ కేసులో వికాస్ పాత్రను నిర్దారించుకున్న పోలీసులు.. అతణ్ని లొంగిపోవాలంటూ బుధవారం (ఆగస్టు 9) సమన్లు జారీ చేశారు. వికాస్.. సమన్లను తీసుకోకపోవడంతో అతడి ఇంటికి అంటించి వచ్చారు. ఉదయం 11 గంటల్లోగా పోలీసుల ముందు హాజరుకావాలని లేకపోతే బలవంతంగా అరెస్టు చేస్తామని నోటీసుల్లో పేర్కొన్నారు. చెప్పిన సమయం కంటే 3 గంటలు ఆలస్యమైనా.. చివరికి వికాస్ పోలీసుల ఎదుట లొంగిపోయాడు. వికాస్‌ను విచారించిన పోలీసులు.. అరెస్టు చేసి ఛార్జ్‌షీటు దాఖలు చేశారు.

వికాస్‌, అతడి స్నేహితులు కలిసి తన కారును వెంబడించారని.. కిడ్నాప్‌ చేసే ప్రయత్నం చేశారని వర్ణికా అనే యువతి ఇటీవల ఫేస్‌బుక్‌లో చేసిన పోస్టు వైరల్‌ అయిన విషయం తెలిసిందే. ఈ కేసులో వికాస్‌, అతడి స్నేహితులను పోలీసులు గత శనివారమే అరెస్టు చేయగా.. వారంతా అదే రోజు బెయిల్‌పై విడుదలయ్యారు. అప్పటి నుంచి వికాస్‌ బయట కనిపించడం లేదు.

మరోవైపు ఘటనపై స్పందిన వికాస్‌ తండ్రి సుభాష్‌ బరాలా.. చట్టాన్ని తాము గౌరవిస్తామని చెప్పారు. తన కొడుకు తప్పకుండా విచారణకు సహకరిస్తాడని తెలిపారు. వికాస్‌ స్టేషన్‌కు రావడానికి ముందే మీడియా ప్రతినిధులతో మాట్లాడిన ఆయన.. ‘నేరస్థులను తప్పనిసరిగా శిక్షించాలి.. అది నా కుమారుడైనా సరే. ఆ అమ్మాయి నా కూతురితో సమానం. నా కుమారుడిని విచారణకు హాజరుకావాలని ఆదేశించా. అతడు మార్గమధ్యలో ఉన్నాడు' అని చెప్పారు.

వికాస్‌ నేరం చేసినట్లు స్పష్టమైన ఆధారాలున్నాయని, అతడిని అరెస్టు చేస్తామని పోలీసులు చెబుతుండగా.. ఆ రోజు కావాలని వెంబడించలేదని వికాస్ అంటున్నాడు. డ్రైవింగ్‌ చేసే వ్యక్తి పురుషుడా, స్త్రీనా అనే విషయంపై స్నేహితులతో బెట్‌ కాశామని, అది తెలుసుకోవడానికే కారును అనుసరించామని అతడు అంటున్నట్లు సమాచారం.