వార్ధా ఎఫెక్ట్: చెన్నైకి ఈదురు గాలుల దెబ్బ

బంగాళాఖాతంలో ఏర్పడిన వార్ధా తుపాను ఉత్తర తమిళనాడు తీరం దిశగా పయనిస్తోంది. దీంతో చెన్నైలో సముద్రం అల్లకల్లోలంగా మారింది. అతితీవ్ర తుపానుగా కొనసాగుతున్న ‘వార్ధా’ సోమవారం మధ్యాహ్నం చెన్నైకి సమీపంలోనే తీరం దాటే అవకాశం ఉందని వాతావరణ శాఖ ప్రకటించింది. తుపాను ప్రభావంతో చెన్నైలో సోమవారం ఉదయం నుంచి భారీ వర్షం కురుస్తోంది. చెన్నై నగరాన్ని ఈదురు గాలులు అతలాకుతలం చేస్తున్నాయి.

గంటకు 57.9 కిలోమీటర్ల వేగంతో వీస్తున్న గాలులకు నగరంలోని చాలా చోట్ల చెట్లు నేలకొరిగాయి. దీంతో వాహన రాకపోకలకు ఆటంకం ఏర్పడుతోంది. భారీ వర్షం కారణంగా చెన్నైలోని లోతట్టు ప్రాంతాలు జలమయమయ్యాయి. దీంతో ముందు జాగ్రత్త చర్యగా పలు ప్రాంతాల్లో అధికారులు విద్యుత్ సరఫరాను నిలిపివేశారు. వార్ధా తుపాను తమిళనాడు తీరం దాటే సమయంలో బలమైన ఈదురు గాలులు వీచే అవకాశముందని వాతావరణ శాఖ హెచ్చరించింది. చెన్నై నగర ప్రజలంతా అప్రమత్తంగా ఉండాలని, అవసరమైతే తన్ప ఇళ్ల నుంచి బయటకు రావద్దని అధికారులు హెచ్చరిస్తున్నారు.

మరోవైపు భారీ వర్షం కారణంగా చెన్నై అంతర్జాతీయ విమానాశ్రయం రన్‌వేను తాత్కాలికంగా మూసివేశారు. దీంతో ఇతర ప్రాంతాల నుంచి చెన్నైకి వస్తున్న విమానాలను బెంగళూరు, హైదరాబాద్‌కు మళ్లిస్తున్నారు. ఈదురు గాలుల కారణంగా చెన్నై-తాంబరం లోకల్ రైలు సర్వీసులకు ఆటంకం ఏర్పడింది.


ఆంధ్ర, తమిళనాడులని వణికిస్తోన్న 'వార్ధా'.. వార్త కోసం ఇక్కడ క్లిక్‌చేయండి