జయ మృతిపై సుప్రీంకోర్టు‌లో పిటిషన్

తమిళనాడు దివంగత సీఎం జయలలిత మృతి విషయంలో ఇప్పటికీ ఎందరో అభిమానులకి పలు అనుమానాలున్నాయి. సెప్టెంబర్ 22న చెన్నైలోని అపోలో ఆసుపత్రిలో అమ్మ చేరినప్పటి నుంచి ఆమె ఆరోగ్య విషయాలూ రహస్యంగానే ఉంచుతూ వచ్చారు. అసలు ఆమెకి ఏమైందో కూడా తెలియని పరిస్థితి. కొన్ని రోజుల క్రితం ఆమె ఆరోగ్యం మెరుగుపడిందని, పేపర్ చదువుతోందని, కావాల్సినవి అడిగి తీసుకుంటున్నారని కూడా అపోలో ఆసుపత్రి వైద్యులు ప్రకటించారు. ఆ సమయంలోనైనా ఆమె వీడియోనో, ఫోటోనో రాష్ట్ర ప్రజల కోసం షేర్ చేసి ఉంటే బాగుండేది.

హఠాత్తుగా కార్డియాక్ అరెస్టు కావడం, అమ్మ లోకాన్ని విడిచి వెళ్లడం జరిగిపోయాయి.దీంతో చాలా మందికి ఆమె మరణంపై అనేక అనుమానాలు కలిగాయి. ఓ స్వచ్ఛంద సంస్థకు అలాంటి అనుమానమే కలిగి సుప్రీం కోర్టులో పిటిషన్ వేసింది. అమ్మ మరణంపై సీబీఐ విచారణ జరిపించాలని, వైద్య నివేదికలను స్వాధీనం చేసుకోవాలని ఆ పిటిషన్ లో కోరారు.