కన్న కూతురికి తల్లి లైంగిక వేధింపులు

దేశంలో అత్యాచారాలు, లైంగిక వేధింపులు రోజు రోజుకూ పెరిగిపోతున్నాయి. ఆడవాళ్లు కనిపించడమే పాపమైనట్లు మీదపడిపోతున్నారు కొందరు మృగాళ్లు. ఇదంతా నాణానికి ఓవైపు మాత్రమే.. నాణానికి మరోవైపు జరుగుతున్న ఘోరాలు తలచుకుంటుంటే మనం మనుషుల మధ్య బతుకుతున్నామా అనే అనుమానం కలగకమానదు. అయినవాళ్లే కన్న బిడ్డలపై అఘాయిత్యాలకు పాల్పడితే.. బాధితులు ఎవరికి చెప్పుకోవాలో అర్థంకాక కుమిలిపోతున్న ఘటనలు చాలానే జరిగాయి. తమిళనాడులో తాజాగా జరిగిన ఘటన మరీ నీచాతి నీచం.. ఘోరాతి ఘోరం. కన్నతల్లి కూతురిని లైంగికంగా వేధించడం మాటల్లో కూడా చెప్పలేని జుగుస్పాకరమైన దారుణం.

చెన్నైలోని తేనాంపేటకు చెందిన మహిళ కుటుంబ కలహాలతో తన భర్త నుంచి విడిపోయింది. ఆమె తన 14ఏళ్ల కూతురు, తల్లితో కలిసి ఉంటోంది. కొద్ది రోజులుగా కామంతో కళ్లుమూసుకుపోయిన తల్లి.. తన కూతురిని వేధిస్తోంది. స్వలింగ సంపర్కానికి బలవంతం చేస్తూ.. ఆమెను చిత్రహింసలు పెట్టింది. రోజూ ఆమెను లైంగిక వేధించేందుకు ప్రయత్నించింది. తన బాధను ఎవరికి చెప్పుకోవాలో అర్థంకాక బాధితురాలు తనలో తానే కుమిలిపోయింది.

తల్లి నుంచి బాలికకు వేధింపులు ఎక్కువయ్యాయి.ఇంట్లోనే ఉన్న బామ్మకు చెప్పినా ఆమె పట్టించుకోకపోగా... తల్లికే వత్తాసు పలికింది. ఈ వేధింపుల్ని తట్టుకోలేని బాధితురాలు.. తన బాధను తండ్రికి చెప్పుకుంది. అతడు ఇంటికి వచ్చి రెండుమూడుసార్లు వారిని హెచ్చరించాడు. అయినా పద్ధతి మార్చుకోలేదు. బాలికను టార్చర్ చేస్తూనే ఉన్నారు. దీంతో బాలిక తన తండ్రితో కలిసి పోలీస్ స్టేషన్ మెట్లెక్కింది. తన తల్లి లైంగికంగా వేధిస్తోందంటూ ఫిర్యాదు చేసింది.

బాధితురాలి ఫిర్యాదుతో రంగంలోకి దిగిన పోలీసులు.. ఆమె తల్లి, బామ్మలను అరెస్ట్ చేశారు. బాలిక తల్లిపై పోక్సో చట్టం కింద కేసు నమోదు చేశారు. చెన్నైలో జరిగిన ఈ దారుణమైన ఘటన సంచలనంగా మారింది.
Read This Story In English