పల్లె కళ, సహజసిద్ధ అందాలు.. మనసుదోచే చెట్టియార్ ఇళ్లు!

ఇంధ్ర భవనాల లాంటి ఇళ్లు, ఖరీదైన వంటకాలు, సుందరమైన చెక్క బొమ్మలు.. చెట్టినాడు సంస్కృతికి అద్దం పట్టే ప్రత్యేకతలు ఇవి. ఇలాంటి ప్రత్యేకమైన, అందమైన ఇళ్ల కారణంగానే తమిళనాడులోని కరైకుడి.. భారత ప్రభుత్వం నుంచి ‘వారసత్వ నగరం’గా గుర్తింపు పొందింది. పల్లె కళ ఉట్టిపడే అత్యంత సాదాసీదా నిర్మాణాలతో, ఆకర్షణీయంగా కనిపించే ఈ విశాలమైన భవంతులన్నీ చెట్టియార్ వంశస్థులకు చెందినవి కావడం విశేషం. 18వ శతాబ్దంలో ఈ వంశానికి చెందిన ప్రజలు వ్యాపారమే ప్రధాన వృత్తిగా జీవనం సాగించేవారు.

See Photos: చెట్టినాడు సంస్కృతికి అద్దం పట్టే ఇళ్లు.. చూపుతిప్పుకోలేరు!

మలేషియా, సింగపూర్, బర్మా తదితర దేశాల్లో చెట్టియార్ వంశస్థులు వ్యాపారం నిర్వహించేవారు. అందుకే వీరి ఇళ్ల నిర్మాణంలో ఆయా దేశాల్లో ప్రత్యేకంగా లభించే వస్తు సామగ్రి కనిపిస్తుంది. సుదూర ప్రాంతాల నుంచి దిగుమతి చేసుకున్న వస్తువులను ఈ ఇళ్ల నిర్మాణాల్లో వినియోగించారు. అందుకే ఇవి సహజ సిద్ధమైన కళతో.. ఇంత కాలమైనా చెక్కు చెదరకుండా ఉన్నాయి.

బర్మా టేకు కలప, ఇటాలియన్ మార్బుల్స్, బెల్జియం అద్దాలు, విద్యుద్దీపాలు చెట్టినాడ్ భవంతుల్లో ప్రత్యేక ఆకర్షణగా నిలుస్తాయి. ఈ ప్రత్యేకమైన నిర్మాణాలు వీక్షకులను చూపు తిప్పుకోనివ్వవు. పల్లె అందాలను తలదన్నె ఈ ఇళ్ల సౌందర్యం.. ఎంతటి ధనికుడి మనసునైనా ఇట్టే లాగేస్తుంది! అందుకే ఈ ఇళ్లకు ఇప్పుడు సమున్నత గౌరవం దక్కింది.