హిందూ మహా సముద్రంలోకి చైనా మిలటరీ నౌకలు: ఇండియన్ నేవీ

భారత్ చుట్టూ నౌకాశ్రయాలను నిర్మిస్తూ.. ముత్యాల సరాన్ని పేరుస్తోన్న చైనా.. తరచుగా హిందూ మహసముద్ర జలాల్లోకి తన నౌకలను పంపిస్తోన్న సంగతి తెలిసిందే. చైనీస్ మిలటరీకి చెందిన నౌకలు హిందూ మహాసముద్రంలోకి ప్రవేశించాయని భారత నౌకాదళ వర్గాలు తెలిపాయి. ఇప్పటి వరకూ తెలిసినన సమాచారం మేరకు.. పశ్చిమ హిందూ మహా సముద్రంలో చైనా చేపల నౌకలను ఇండియన్ నేవీ ఎయిర్‌క్రాఫ్ట్ గుర్తించింది.

చేపలను పట్టే ఈ నౌకలకు రక్షణగా చైనా ఆర్మీకి నేవీ షిప్స్ రావడం గమనార్హం. ఇవి మొరాకో దిశగా కదులుతున్నాయని న్యూస్ ఏజెన్సీ ఏఎన్ఐ తెలిపింది. హిందూ మహా సముద్ర ప్రాంతంలో చైనా నౌకల కదలికలు వేగంగా పెరుగుతున్నాయని ఇండియన్ నేవీ చీఫ్ అడ్మిరల్ కరంబీర్ సింగ్ ఈ నెల ఆరంభంలో వ్యాఖ్యానించిన నేపథ్యంలో ఈ వార్త వెలుగులోకి రావడం గమనార్హం. హిందూ మహాసముద్ర ప్రాంతంలో జరుగుతున్న పరిణామాలపై ఇండియన్ నేవీ నిరంత నిఘా పెట్టిందని ఆయన తెలిపారు.

రైజినా డైలాగ్‌లో మాట్లాడిన నేవీ చీఫ్.. చైనా మిలటరీ నౌకలు కొన్ని సందర్భాల్లో భారత ప్రత్యేక ఆర్థిక జోన్‌లోని జలాల్లోకి చొరబడ్డాయని తెలిపారు. ఇది భారత ప్రయోజనాలపై ప్రభావం చూపుతుందని ఇండియన్ నేవీ వారికి స్పష్టం చేసిందన్నారు. మేం రంగంలోకి దిగగానే వారు గౌరవించి వెనక్కి మళ్లారని అడ్మిరల్ తెలిపారు.

పీపుల్ లిబరేషన్ ఆర్మీలో వ్యూహాత్మక విభాగమైన చైనా నేవీ చాలా వేగంగా పురోగతి సాధిస్తోందని అడ్మిరల్ తెలిపారు. చైనా నౌకాదళ బలం, వారి దగ్గర ఎన్ని నౌకలు ఉన్నాయి, అది ఎలా వృద్ధి చెందుతుందో మనందరికీ తెలుసు. పైరెట్లను అరికట్టడం పేరిట 2008లో హిందు మహా సముద్రంలోకి చైనా ఎలా వచ్చిందో కూడా చూశామన్నారు. గతంలో చైనా నౌకలు హిందూ మహసముద్రంలో కనిపించేవి కాదు.. కానీ ఇప్పుడు ఏ సమయంలోనైనా 7-8 చైనా యుద్ధనౌకలు ఆ ప్రాంతంలో కనిపిస్తున్నాయని అడ్మిరల్ అన్నారు.