చిత్రకూట్‌ ఉపఎన్నికలో కాంగ్రెస్ విజయం

మధ్యప్రదేశ్‌లోని చిత్రకూట్ అసెంబ్లీ స్థానానికి నిర్వహించిన ఉప ఎన్నికలో కాంగ్రెస్ పార్టీ విజయం సాధించింది. ఆ పార్టీకి చెందిన నీలాన్షు చతుర్వేది 14 వేల ఓట్ల తేడాతో బీజేపీకి చెందిన దయాల్ త్రిపాఠిపై గెలుపొందాడు. కాంగ్రెస్ పార్టీకి చెందిన సిట్టింగ్ ఎమ్మెల్యే ప్రేమ్ సింగ్ (65) మరణించడంతో ఉప ఎన్నికను నిర్వహించాల్సి వచ్చింది. నవంబర్ 9న ఓటింగ్ నిర్వహించగా, ఆదివారం ఉదయం 8 గంటలకు పటిష్ట భద్రత మధ్య ఓట్ల లెక్కింపు మొదలైంది.

ఉత్తర ప్రదేశ్ సరిహద్దుల్లో ఉండే చిత్రకూట్ నుంచి ప్రేమ్ సింగ్ 1998, 2003, 2013 ఎన్నికల్లో గెలుపొందారు. 2008లో బీజేపీ అభ్యర్థి సురేంద్ర సింగ్ గహర్వార్ చేతిలో ఓడిపోయారు. ప్రేమ్ సింగ్ మరణంతో.. ఆ స్థానాన్ని తన ఖాతాలో వేసుకోవాలని అధికార బీజేపీ భావించింది. దీంతో ఉప ఎన్నిక అనివార్యమైంది. ఈ ఉప ఎన్నికలో 12 మంది అభ్యర్థులు పోటీ పడగా, 65 శాతం మంది ఓటు హక్కు వినియోగించుకున్నారు.