తరగతులకు డుమ్మా.. ప్రశ్నించిన హెచ్‌ఎం తలపై దాడి!

తరగతులకు డుమ్మా కొడుతున్న అంశంపై ప్రశ్నించినందుకు ఓ విద్యార్థి తన స్కూల్ హెడ్‌మాస్టర్‌పై దాడి చేసి తీవ్రంగా గాయపరిచాడు. తమిళనాడులోని తిరుపత్తూర్‌లో ఈ ఘటన చోటు చేసుకుంది. స్థానిక గవర్నమెంట్ స్కూల్‌లో 11వ తరగతి చదువుతున్న ఓ బాలుడు మరో నలుగురు స్నేహితులతో కలిసి గత కొన్ని రోజులుగా తరచూ తరగతులకు గైర్హాజరవుతున్నారు. క్లాసులు మానేసి పాఠశాల పరిసరాల్లో తిరుగుతూ కాలక్షేపం చేస్తున్నారు.

సోమవారం (ఫిబ్రవరి 5) ఆ అయిదుగురు విద్యార్థులు మరోసారి తరగతులకు డుమ్మా కొట్టి బయట తిరుగుతూ హెడ్‌మాస్టర్ ఆర్. బాబు దృష్టిలో పడ్డారు. ఆయణ్ని చూడటంతోనే నలుగురు విద్యార్థులు అక్కడ నుంచి పారిపోగా.. ఐదో విద్యార్థి ఖాళీగా ఉన్న ఓ తరగతి గదిలో దాక్కున్నాడు.

ఆ విద్యార్థిని దొరకబుచ్చుకున్న హెడ్‌మాస్టర్.. తరగతులకు ఎందుకు డుమ్మా కొడుతున్నావంటూ రెండు దెబ్బలు తగిలించాడు. దీంతో ఆ అల్లరిపిడుగు అక్కడే ఉన్న ఓ పదునైన వస్తువుతో ఆయణపై దాడి చేశాడు. కడుపులో, తల భాగంలో తీవ్రమైన గాయాలవడంతో హెడ్‌మాస్టర్‌‌ను ఆసుపత్రికి తరలించి చికిత్స అందిస్తున్నారు.