టీచర్‌ని రేప్ చేస్తానని బెదిరించిన ఏడో తరగతి విద్యార్థి

తల్లితండ్రుల పర్యవేక్షణ సరిగాలేకపోవడం అడ్డదారులు తొక్కుతూ స్కూలు పిల్లలు ఎలా చెడిపోతున్నారో చెప్పడానికి ఇదొక ఉదాహరణ. ఏడో తరగతి చదువుతున్న బాలుడు తనకు పాఠాలు చెప్పే టీచర్‌నే రేప్ చేస్తానని బెదిరించాడు. అంతేకాకుండా ఆ టీచర్ కుమార్తెను కూడా రేప్ చేస్తానన్నాడు. ఈ మేరకు ఆన్‌లైన్‌లో ఓ పోస్ట్ పెట్టాడు. దేశ రాజధాని ఢిల్లీకి అతి సమీపంలో ఉండే ఈ ఘటన గురుగ్రామ్‌లో జరిగింది. గురుగ్రామ్‌లోని ఓ ప్రముఖ పాఠశాల (విద్యార్థులు, టీచర్ల గుర్తింపు బయటపడకుండా ఉండటానికి పాఠశాల పేరును గోప్యంగా ఉంచుతున్నాం)లో ఈ ఘటన చోటుచేసుకోవడంతో చైల్డ్ వెల్ఫేర్ కమిటీ రంగంలోకి దిగింది.

ఈ పాఠశాలలో గడిచిన వారం రోజుల్లో ఇలాంటి ఘటన ఇది రెండోది. ఎనిమిదో తరగతి చదువుతున్న ఓ విద్యార్థి తన క్లాస్ టీచర్‌కు ఓ మెయిల్ పంపాడు. తనతో క్యాండిల్‌లైట్ డేట్‌కు రావాలని, సెక్సులో పాల్గొనాలని కోరాడు. ఈ రెండు ఘటనలతో స్కూలు యాజమాన్యం మేల్కొంది. నివారణ చర్యలు ప్రారంభించింది. ‘ఈ ఘటనలో లోయర్ మిడిల్ స్కూల్ విద్యార్థి ప్రమేయం ఉంది. టీచర్‌కు అభ్యంతరకరంగా ఇంటర్నెట్ ద్వారా మెసేజ్‌లు పంపారని ఆరోపిస్తున్నారు. దీనిపై దర్యాప్తు జరుపుతున్నాం. కచ్చితంగా చర్యలు తీసుకుంటాం. సస్పెండ్ చేయడంతోపాటు కౌన్సెలింగ్ కూడా ఇస్తాం. ఇలాంటి చర్యలపై స్కూలు పారదర్శకంగా చర్యలు తీసుకుంటుంది’ అని పాఠశాల ఒక ప్రకటనను విడుదల చేసింది.

ఈ ఘటనలపై చైల్డ్ వెల్ఫేర్ కమిటీ చైర్‌పర్సన్ శకుంతల ధుల్ స్పందించారు. ఈ రెండు ఘటనలను సుమోటోగా తీసుకొని విచారిస్తామన్నారు. విద్యార్థులకు, పాఠశాలకు నోటీసులు పంపామని, వారిని విచారణకు పిలిచి ఘటనలపై దర్యాప్తు చేస్తామని చెప్పారు. స్కూలు యాజమాన్యం, ఉపాధ్యాయులు, విద్యార్థులు అందరికీ కౌన్సెలింగ్ ఇస్తామని స్పష్టం చేశారు. ఇలాంటి చాలా కేసుల్లో తల్లిదండ్రుల పర్యవేక్షణ సరిగా లేకపోవడం వల్లే పిల్లలు చెడిపోతున్నారని తేలింది. అరచేతిలోకి ఇంటర్నెట్ వచ్చేయడంతో చూడకూడనివి కూడా పిల్లలు చూసి చెడిపోతున్నారని నిపుణులు అంటున్నారు.