మరోసారి అదే పైశాచికం.. విద్యార్థినిపైకి వీర్యంతో నింపిన హోలీ బెలూన్

హోలీ వేడుకల పేరుతో కొంత మంది యువకులు తమపై వీర్యంతో నింపిన బెలూన్లు వదిలారని ఢిల్లీ లేడీ శ్రీరామ్ కాలేజీ విద్యార్థులు ఆందోళన చేస్తుండగానే.. అలాంటిదే మరో ఘటన చోటు చేసుకుంది. బస్సులో ప్రయాణిస్తున్న ఓ కాలేజీ విద్యార్థినిపై కొందరు ఆకతాయిలు వీర్యం నింపిన బెలూన్లు విసిరారు. దీంతో ఆ అమ్మాయి పోలీసులను ఆశ్రయించింది. అనంతరం ఆమె మీడియాతో మాట్లాడుతూ.. తాను బస్సులో ఉన్నపుడు కొంతమంది యువకులు బయటి నుంచి బెలూన్లు విసిరారని, అసహ్యంగా ప్రవర్తించారని ఆవేదన వ్యక్తం చేసింది. అమ్మాయిల పట్ల జుగుప్సాకరంగా ప్రవర్తిస్తూ గౌరవాన్ని దెబ్బతీస్తున్నారని మండిపడింది.

హోలీ వేడుకల పేరుతో ఆకతాయిలు యువతులపై వాటర్ ప్యాకెట్లు, వీర్యం నింపిన బెలూన్లను విసిరేస్తూ అసభ్యకరంగా ప్రవర్తిస్తుండటం పట్ల విద్యార్థులు తీవ్ర నిరసన వ్యక్తం చేశారు. ఢిల్లీలోని పలు ప్రాంతాల్లో ర్యాలీలు, ధర్నాలు నిర్వహించారు. నిబంధనలకు విరుద్ధంగా జరుగుతున్న హోలీ వేడుకలను నిషేధించాలని డిమాండ్ చేస్తూ ఢిల్లీ పోలీస్ హెడ్ క్వార్టర్స్ వద్ద ఆందోళన చేపట్టారు.