Monsoon Rains అరేబియాలో అనుకూల పరిస్థితి.. వచ్చే 2-3 రోజుల్లో కేరళకు రుతుపవనాలు: ఐఎండీ

నైరుతి రుతుపవనాలకు (Southwest Monsoon) అనుకూలమైన వాతావరణం నెలకుందని, మరో రెండు మూడు రోజుల్లో కేరళ తీరాన్ని తాకే అవకాశం ఉందని భారత వాతావరణ విభాగం (IMD) శుక్రవారం ప్రకటించింది. తొలుత మే 27నే రుతుపవనాలు కేరళను తాకుతాయని అంచనా వేశారు. కానీ, ప్రతికూల పరిస్థితులతో నైరుతి రుతుపవనాలు నెమ్మదించాయి. రాబోయే 48 గంటల్లో దక్షిణ అరేబియా సముద్రంలోని మరికొన్ని ప్రాంతాలు, మొత్తం మాల్దీవులు, లక్షద్వీప్‌ పరిసరాలతో పాటు కొమరిన్‌లోని కొన్ని ప్రాంతాలకు విస్తరించనున్నాయని ఐఎండీ తెలిపింది. ముందుకు సాగడానికి అనుకూల పరిస్థితులు ఏర్పడ్డాయని పేర్కొంది. దీంతో నైరుతి రుతుపవనాలు బలపడి కేరళ, తమిళనాడు, లక్షద్వీప్, ఆంధ్రప్రదేశ్, తెలంగాణ రాష్ట్రాల్లో మోస్తరు నుంచి భారీ వర్షాలు కురిసే అవకాశం ఉందని చెప్పింది.‘‘తాజా వాతావరణ సూచనల ప్రకారం.. దక్షిణ అరేబియా సముద్రం మీదుగా పశ్చిమ గాలులు బలపడ్డాయి. ఉపగ్రహ ఫోటోలు ప్రకారం కేరళ తీరం.. దానిని ఆనుకుని ఉన్న ఆగ్నేయ అరేబియా సముద్రం మీదుగా ఆకాశం మేఘావృతమై ఉంది.. అందుకే పరిస్థితులు అనుకూలంగా మారుతున్నాయి.. వచ్చే 2-3 రోజుల్లో కేరళలో రుతుపవనాలు ప్రారంభమవుతాయి.. తదుపరి పరిస్థితులు కూడా అనుకూలంగా ఉంటాయి.. అదే కాలంలో నైరుతి రుతుపవనాలు అరేబియా సముద్రం, లక్షద్వీప్ ప్రాంతంలోని మరికొన్ని ప్రాంతాలలోకి ప్రవేశిస్తాయి’’ అని వెల్లడించింది.

నైరుతి రుతుపవనాలు దక్షిణ శ్రీలంకను పూర్తిగా ఆవహించాయి. ఆరు రోజుల అనంతరం నైరుతి రుతుపవనాలు వేగంగా కేరళ వైపు పయనిస్తున్నాయని తెలిపింది.
నైరుతి రుతుపవనాలు సాధారణంగా జూన్ మొదటి వారంలో కేరళ తీరాన్ని తాకుతాయి. కానీ, ఈ ఏడాది ముందుగానే తాకనున్నాయి. ఇటీవల బంగాళాఖాతంలో ఏర్పడిన అసని తుఫాను కారణంగా రుతుపవనాలు గత నెలలో వేగం పుంజుకున్నాయని వాతావరణ నిపుణులు పేర్కొన్నారు. ఈ ఏడాది నైరుతి రుతుపవనాల ప్రభావంతో దేశవ్యాప్తంగా సాధారణ వర్షాలు కురుస్తాయని ఐఎండీ అంచనా వేసింది.

ఏపీలోని వివిధ ప్రాంతాల్లో వాతావరణ పరిస్థితులను ప్రకటించారు. ఉత్తర కోస్తా, యానంలలో గురు, శుక్ర, శనివారాల్లో తేలికపాటి నుంచి మోస్తరు వర్షాలు లేదా ఉరుములతో కూడిన జల్లులు కొన్ని చోట్ల కురిసే అవకాశం ఉంది. ఉరుములు, మెరుపులతో కూడిన భారీ వర్షం ఒకటి రెండు చోట్ల పడుతుందని వాతావరణ శాఖ పేర్కొంది.