యడ్యూరప్ప రాజీనామా..కాంగ్రెస్, జేడీఎస్ సంబరాలు

దక్షిణాదిలో పాగా వేయాలన్న బీజేపీ ఆశలకు గండికొట్టడంలో కాంగ్రెస్ విజయం సాధించింది. యడ్యూరప్ప సీఎం పదవికి రాజీనామా చేయడంతో కాంగ్రెస్-జేడీఎస్‌లో ఉత్సాహం పెరిగింది. యడ్డీ రాజీనామా చేస్తున్నట్లు ప్రకటించి అసెంబ్లీ నుంచి బయటకు వెళ్లిపోయాక... రెండు పార్టీల ఎమ్మెల్యేలు సంబరాలు చేసుకున్నారు. ప్రజాస్వామ్యం గెలిచిందంటూ సభలోనే నినాదాలు చేశారు. తర్వాత ఒకరికి ఒకరు అభినందనలు తెలుపుకున్నారు. జేడీఎస్ నేత కుమార స్వామి, కాంగ్రెస్ సీనియర్ నేత శివకుమార్‌ దగ్గరకు వెళ్లి చేతులు కలిపారు. విక్టరీ సింబల్ చూయిస్తూ ఉత్సాహంగా అసెంబ్లీ నుంచి బయటకు వచ్చారు.

ఇటు యడ్యూరప్ప రాజీనామాతో కాంగ్రెస్, జేడీఎస్ కార్యకర్తలు, నేతలు కూడా సంబరాలు జరుపుకున్నారు. పార్టీ కార్యాలయాల దగ్గర సందడి వాతావరణం కనిపించింది. స్వీట్లు తినిపించుకుంటూ టపాసులు పేలుస్తూ తమ ఆనందాన్ని పంచుకున్నారు. అలాగే డప్పులతో డ్యాన్సులు చేస్తూ ఫుల్ జోష్‌లో ఉన్నారు. బెంగళూరు మాత్రమే కాదు మిగిలిన రాష్ట్రాల్లో కూడా కాంగ్రెస్ నేతలు సంబరాలు చేసుకోవడం విశేషం.