ఎయిర్‌పోర్ట్‌లో ఉద్యోగి చెంప చెల్లుమనిపించిన పోలీస్ అధికారి

ఎస్‌ఐ స్థాయి అధికారి ఒకరు స్పైస్‌జెట్ ఉద్యోగి చెంప చెల్లుమనిపించారు. ఆలస్యంగా వచ్చి బోర్డింగ్‌ పాస్‌ అడగడంతో.. ఇవ్వడానికి నిరాకరించడమే అందుక్కారణం. ఈ ఘటన అహ్మదాబాద్ విమానాశ్రయంలో చోటు చేసుకుంది. గుజరాత్‌కు చెందిన ఓ పోలీస్ అధికారి మరో ఇద్దరు వ్యక్తులతో కలిసి మంగళవారం (నవంబర్ 17) అహ్మదాబాద్‌ ఎయిర్‌పోర్టుకు వచ్చారు. వారంతా ఢిల్లీకి వెళ్లడం కోసం స్పైస్‌జెట్‌ ఎస్‌జీ-8194 విమానంలో టిక్కెట్లు బుక్‌ చేసుకున్నారు. అయితే.. ఆలస్యంగా రావడంతో ఎయిర్‌పోర్టు సిబ్బంది.. వారిని బోర్డింగ్‌కు అనుమతివ్వలేదు. దీంతో ఆగ్రహంతో ఊగిపోయిన ఆ పోలీసు అధికారి స్పైస్‌జెట్‌ స్టాఫ్‌తో వాగ్వాదానికి దిగాడు.

తమకు బోర్డింగ్‌ పాస్‌ ఇవ్వడానికి నిరాకరించడంతో ఆగ్రహంతో ఊగిపోయిన ఆ అధికారి.. సిబ్బంది చెంప పగలకొట్టాడు. అధికారితో వచ్చిన మిగతా ఇద్దరు కూడా గొడవకు దిగడంతో ఘర్షణ ముదిరింది. దీంతో ఎయిర్‌పోర్టు భద్రతా సిబ్బంది, సీఐఎస్‌ఎఫ్‌ స్టాఫ్‌ రంగంలోకి దిగి పరిస్థితిని నియంత్రించారు.

స్పైస్‌జెట్ ఉద్యోగితో పాటు పోలీసు అధికారిని, ఆయనతో పాటు ఉన్న మిగతా ఇద్దరిని స్థానిక పోలీసు స్టేషన్‌లో అప్పగించారు. ఆ తర్వాత వారి మధ్య రాజీ కుదరడంతో ఫిర్యాదు వెనక్కి తీసుకున్నట్లు సమాచారం. మొత్తం మీద ఆ పోలీసు అధికారికి విమానంలో ప్రయాణించడానికి అనుమతి మాత్రం లభించలేదు.

Must Read: కశ్మీర్‌లో హిమపాతం బీభత్సం.. జవాన్ మృతి, మరో ఇద్దరికి గాయాలు