భారత్‌లో 9 వేలు దాటిన కరోనా కేసులు.. ఒక్క రోజే 796 మందికి కోవిడ్

భారత్‌లో కరోనా వైరస్ కేసుల సంఖ్య 9 వేల మార్క్ దాటింది. మన దేశంలో కోవిడ్-19 కేసుల సంఖ్య 9,152కి చేరాయని కేంద్ర ఆరోగ్య శాఖ తెలిపింది. మొత్తం 308 మంది ప్రాణాలు కోల్పోయారని తెలిపింది. గత 24 గంటల్లోనే దేశంలో 796 కరోనా కేసులు నమోదు కాగా.. 35 మంది చనిపోయారని ఆరోగ్య మంత్రిత్వ శాఖ వెల్లడించింది. మృతుల్లో మహారాష్ట్రకు చెందిన వారు 22 మంది ఉండగా.. గుజరాత్‌కు చెందిన ముగ్గురు, బెంగాల్‌కు చెందిన ఇద్దరు, తమిళనాడు‌కు చెందిన ఒకరు ప్రాణాలు కోల్పోయారు.

ప్రస్తుతం దేశంలో 7987 యాక్టివ్ కేసులు ఉండగా.. 856 ఇప్పటి వరకూ కోలుకొని డిశ్చార్జ్ అయ్యారు. కరోనా బారిన పడిన వారిలో 72 మంది విదేశీయులు కూడా ఉన్నారని ఆరోగ్య మంత్రిత్వ శాఖ తెలిపింది.

ఇప్పటి వరకూ ప్రపంచవ్యాప్తంగా 18.5 లక్షల మంది కరోనా వైరస్ బారిన పడగా 1.14 లక్షల మందికిపైగా ప్రాణాలు కోల్పోయారు. అమెరికాలో అత్యధికంగా కరోనా బాధితులు ఉండగా.. ప్రాణ నష్టం కూడా ఇక్కడే ఎక్కువగా ఉంది.