Covid 19 In India: 24 గంటల్లో 88 కేసులు.. 700కు చేరువలో బాధితుల సంఖ్య

కరోనా కట్టడి కోసం దేశం మొత్తం లాక్‌డౌన్ విధించినప్పటికీ.. భారత్‌‌లో కోవిడ్ కేసుల సంఖ్య క్రమంగా పెరుగుతోంది. గురువారం రాత్రి సమయానికి దేశంలో కరోనా కేసుల సంఖ్య 694కు చేరింది. ఇప్పటి వరకూ మన దేశంలో కోవిడ్ బారిన పడి 16 మంది ప్రాణాలు కోల్పోయారు. బుధవారం సాయంత్రానికి 606 మంది కరోనా సోకగా.. ఒక్క రోజులోనే 88 మంది కోవిడ్ బారిన పడ్డారు, నలుగురు ప్రాణాలు కోల్పోయారు. కర్ణాటకలో మరణించిన 75 ఏళ్ల వృద్ధురాలికి కూడా కరోనా సోకినట్లు నిర్ధారించారు. ఆమె సొంతూరు అనంతపురం జిల్లాలోని హిందూపురం కావడం గమనార్హం.

కేరళలో అత్యధికంగా 19 మందికి కరోనా పాజిటివ్‌గా నిర్ధారణ అయ్యింది. మధ్యప్రదేశ్‌లో ఆరుగురికి కరోనా పాజిటివ్ అని తేలగా.. ఆ రాష్ట్రంలో 21 మందికి కోవిడ్ నిర్ధారణ అయ్యింది. బిహార్‌లో 20 ఏళ్ల యువకుడికి కరోనా సోకింది. ఆ రాష్ట్రంలోని కేసుల సంఖ్య ఏడుకి పెరిగింది. తెలంగాణలో మరో ముగ్గురికి కరోనా పాజిటివ్ అని తేలింది. వీరిలో ఇద్దరు డాక్టర్ దంపతులు ఉన్నారు. దీంతో రాష్ట్రంలో కోవిడ్ కేసుల సంఖ్య 44కు చేరుకోగా.. ఒకరు కోవిడ్ నుంచి కోలుకొని డిశ్చార్జ్ అయ్యారు.

Must Read: పోర్న్ సైట్లకు పెరిగిన గిరాకీ.. అదును చూసి ఆఫర్లు

కరోనా వైరస్ కేసుల సంఖ్య పెరుగుతున్నప్పటికీ.. పెరుగుదల రేటు నిలకడగా ఉందని ఆరోగ్య శాఖ ప్రకటించింది. లాక్‌డౌన్‌ను ఉల్లంఘిస్తే.. కరోనా సామూహిక వ్యాప్తి మొదలయ్యే అవకాశం ఉందని హెచ్చరించింది. కరోనా వైరస్‌ను అడ్డుకోవడానికి లాక్‌డౌన్ ప్రకటించగా.. పేదలకు ఇబ్బంది కలగకుండా చూడటం కోసం రూ.1.70 లక్షల కోట్ల ప్యాకేజీని కేంద్రం ప్రకటించింది. మార్చి 14 వరకు విమాన సర్వీసులు, రైళ్లు నిలిచిపోనున్నాయని కేంద్రం తెలిపింది.

ప్రపంచవ్యాప్తంగా కరోనా వైరస్ కేసుల సంఖ్య 4.68 లక్షలకు చేరింది. యూరప్‌లోనే కోవిడ్ బాధితుల సంఖ్య 2.5 లక్షలు దాటడం గమనార్హం. ఇటలీలో మరణాల సంఖ్య 7500 దాటగా.. స్పెయిన్‌లో 4000 దాటింది. ఈ రెండు దేశాలూ కరోనా మరణాల సంఖ్యలో చైనాను దాటేసిన సంగతి తెలిసిందే.