పోలీసులపై నాటు బాంబులు.. కాన్పూర్ తరహా దుశ్చర్య, ఇద్దరి మృతి

తమిళనాడులోని తూత్తుకుడిలో కాన్పూర్ తరహా ఘటన చోటు చేసుకుంది. అరెస్ట్‌ చేసేందుకు వెళ్లిన పోలీసులపై నిందితులు నాటుబాంబులు విసిరారు. ఈ ఘటనలో ఇద్దరు వ్యక్తులు మృతి చెందగా మరొకరు గాయపడ్డారు. తూత్తుకుడి జిల్లా మణక్కరై ప్రాంతంలో మంగళవారం (ఆగస్టు 18) జరిగింది.

రెండేళ్ల కిందట జరిగిన జంట హత్యల కేసులో ప్రత్యేక పోలీసు బృందం నిందితులను అరెస్ట్‌ చేసేందుకు వెళ్లగా.. రౌడీ షీటర్లు పోలీసులపై నాటుబాంబులు విసిరారు. ఈ ఘటనలో కానిస్టేబుల్‌ సుబ్రమణ్యం, బాంబు విసిరిన రౌడీ షీటర్‌ దురై ముత్తు మృతి చెందారు. మరో కానిస్టేబుల్‌ గాయపడ్డారు.

నిందితుల్లో ఒకరిని అదుపులోకి తీసుకోగా.. మరికొందరు పరారయ్యారని పోలీసులు తెలిపారు. నిందితుల వాహనంతో పాటు ఆయుధాలను కూడా స్వాధీనం చేసుకున్నట్లు వెల్లడించారు. ఘటనా స్థలాన్ని జిల్లా ఎస్పీ జయకుమార్‌ పరిశీలించారు. ఘటనకు సంబంధించిన పూర్తి వివరాలు తెలియాల్సి ఉంది.

Video: వరద నీటిలో తెగింపు.. బైక్‌తో పాటు కొట్టుకుపోయిన యువకులు