భార్యాభర్తల కేసుల కొట్లాట.. సుప్రీంకోర్టులో వెరైటీ పంచాయితీ

భార్యభర్తలన్న తర్వాత మనస్పర్థలు రావడం సాధారణం. ఒకవేళ ఇద్దరూ ఉదయం తిట్టుకున్నా.. సాయంత్రానికి మళ్లీ ఒకటయ్యే రోజులివి. కాని బెంగళూరుకు చెందిన ఓ జంట మాత్రం అలా కాదు. మనస్పర్థలతో కేసుల కొట్లాటకు దిగారు. ఒకరిపై మరొకరు ఏకంగా 67 కేసులు పెట్టుకున్నారు. ఈ పంచాయితీ ఏకంగా సుప్రీంకోర్టుకు కూడా చేరగా.. ఇవెక్కడి కేసుల రా బాబూ అంటూ కోర్టు కూడా అసహనం వ్యక్తం చేసింది. ఇకపై దంపతులిద్దరూ ఎలాంటి కేసులు పెట్టుకోకుండా ఆంక్షలు పెట్టింది.

అసలు స్టోరీలోకి వస్తే.. బెంగళూరుకు చెందిన ఐటీ ఉద్యోగికి 2002లో వివాహయ్యింది. పెళ్లి అయ్యాక ఇద్దరూ అమెరికా వెళ్లి స్థిరపడగా.. 2009లో ఓ బాబు కూడా పుట్టాడు. అయితే సాఫీగా సాగుతున్న కాపురంలో మనస్పర్థలు మొదలయ్యాయి. భార్యాభర్తలకు క్షణం కూడా పడేది కాదట. దీంతో భార్య అమెరికా నుంచి తిరిగి బెంగళూరు వచ్చేసి.. తల్లిదండ్రులతో కలిసి ఉంటోంది. తర్వాత భార్యాభర్తలిద్దరూ విడాకులు కోసం కోర్టును కూడా ఆశ్రయించారు. ఆ కేసు నడుస్తుండగానే.. ఇద్దరి మధ్య గొడవలు మరింత ముదిరాయి.

విడిగా ఉంటున్నా భార్యాభర్తల మధ్య తరచూ గొడవలు జరుగుతూనే ఉండేవట. విడాకుల కోసం కోర్టు చుట్టూ తిరుగుతూనే.. ఒకరిపై మరొకరు కేసులు పెట్టుకున్నారు. భర్త భార్యపై 58 కేసులు పెట్టగా.. భార్య భర్తపై 9 కేసులు పెట్టింది. ఈ కేసుల్లో కొన్ని సుప్రీంకోర్టుకు కూడా చేరాయి. ఈ కేసులపై విచారణ చేసిన కోర్టు.. ఈ జంటపై మండిపడింది. ఈ కేసుల కొట్లాటకు పుల్‌స్టాప్ పెట్టమని ఆదేశించింది. పెండింగ్ కేసులు క్లియర్ అయ్యే వరకు భార్యాభర్తలు, వారి కుటుంబ సభ్యులు ఎలాంటి కొత్త కేసులు పెట్టకూడదని చెప్పింది.

ఈ దంపతుల విడాకుల కేసును ఆరు నెలల్లోపు క్లియర్ చేయాలని బెంగళూరులోని కోర్టుల్ని ఆదేశించింది అత్యున్నత న్యాయ స్థానం. విడాకులు ఇవ్వడమా.. ఒక వేళ విడాకులు ఇస్తే కుమారుడి బాధ్యతలు ఎవరు తీసుకోవాలి.. తదితర అంశాలపై కోర్టులు విచారణ చేపట్టాలని సూచించింది. ఈ బెంగళూరు దంపతుల కేసులు వ్యవహారం దేశవ్యాప్తంగా హాట్‌టాపిక్‌గా మారింది. మరి కోర్టు ఈ కేసులపై ఎలాంటి తీర్పును ఇస్తుందన్నది ఆసక్తిగా మారింది.