సాయం కోరిన మహిళ.. స్పందించిన సుష్మా స్వరాజ్

మతాంతర వివాహం చేసుకున్న ఓ జంటకు ప్రభుత్వ అధికారి షాకిచ్చాడు. మతం అనే మత్తులో పడి దారుణంగా ప్రవర్తించాడు. మహిళని కూడా చూడకుండా అందరి ముందు అవమానించాడు. బాధతో ప్రభుత్వ కార్యాలయం నుంచి వెనుతిరిగిన బాధితురాలు తన గోడును కేంద్రమంత్రి సుష్మా స్వరాజ్‌‌కు ట్విట్టర్ ద్వారా వెళ్లబోసుకుంది. వెంటనే రంగంలోకి దిగిన సుష్మా సమస్యను వెంటనే పరిష్కరించి నెటిజన్ల నుంచి ప్రశంసలు అందుకుంటున్నారు.

అసలు స్టోరీలోకి వస్తే.. ఉత్తరప్రదేశ్‌లోని లక్నోకు చెందిన తన్వి సేత్ సిద్ధిఖీ అనే వ్యక్తిని 12 ఏళ్ల క్రితం పెళ్లి చేసుకొంది. భర్తకు గతంలోనే పాస్‌పోర్ట్ ఉంటే.. ఆమె మాత్రం కొత్తగా దరఖాస్తు చేసుకొన్నారు. భర్త రెన్యువల్ చేసుకునేందుకు అప్లై చేశారు. ఆ పనిమీద పాస్‌పోర్ట్‌కు దంపతులిద్దరూ వెళ్లారు. అక్కడ కౌంటర్‌లో ఉన్న వికాస్ మిశ్రా అనే అధికారి దారుణంగా ప్రవర్తించాడట. ఇదే విషయాన్ని సుష్మాకు ట్వీట్ చేస్తూ.. ‘మేడమ్.. పాస్‌పోర్ట్ ఆఫీస్‌లో అధికారులు ప్రజల పట్ల ఈ విధంగా ప్రవర్తిస్తారని అసలు అనుకోలేదు. నేను ముస్లింని పెళ్లి చేసుకున్నానని ఓ అధికారి అవమానించాడు’.

‘మా ఇద్దరిలో ఎవరో ఒకరు పేరు మార్చుకోవాలని అన్నాడు ఆ అధికారి. మా దంపతులిద్దరి పాస్‌పోర్టుల్ని హోల్డ్‌లో పెట్టాడు.ఆ అధికారి ప్రవర్తన చూసి షాకయ్యా. నా 12 ఏళ్ల వైవాహిక జీవితంలో నేనెప్పుడూ ఇంతటి అవమానాన్ని ఎదుర్కోలేదు. పెళ్లి తర్వాత ఏ పేరు పెట్టుకోవాలన్నది నా వ్యక్తిగతం. మా కుటుంబానికి సంబంధించింది.. పాస్‌పోర్ట్‌ వచ్చేలా సాయం చేయండని’అని కోరింది. సుష్మా స్వరాజ్ ఈ ట్వీట్‌పై వెంటనే స్పందించారు. ఈ సమస్యను పరిష్కరించాలని పీయూష్ వర్మ అనే అధికారికి సూచించగా.. ఆయన పాస్‌పోర్టులను వారికి అందజేశారు. అలాగే దంపతులను అవమానించిన అధికారిపై బదిలీ వేటు వేశారు.

Read This Story In English