PM Modi: కొద్ది రోజుల్లో కొవిడ్ వ్యాక్సిన్.. శుభవార్త చెప్పిన ప్రధాని

కరోనా వ్యాక్సిన్ గురించి ఆసక్తిగా ఎదురుచూస్తున్న భారతీయులకు ప్రధాని నరేంద్ర మోదీ శుభవార్త అందించారు. కొద్ది వారాల్లోనే వ్యాక్సిన్ అందుబాటులోకి వస్తుందని చెప్పారు. కొవిడ్ వ్యాక్సిన్ వచ్చిన వెంటనే దేశవ్యాప్తంగా పంపిణీ ప్రక్రియ ప్రారంభమవుతుందని తెలిపారు. తొలుత ఆరోగ్య సిబ్బంది, వృద్ధులకే టీకా అందిస్తామన్నారు. ప్రధాని మోదీ అధ్యక్షతన శుక్రవారం (డిసెంబర్ 4) అఖిలపక్ష సమావేశం జరిగింది. విర్చువల్ ద్వారా జరిగిన ఈ సమావేశంలో దేశంలో కరోనా పరిస్థితులు, వ్యాక్సినేషన్ ప్రక్రియపై చర్చించారు.

వ్యాక్సిన్ ధరలపై ప్రభుత్వం ఇంకా ఎలాంటి నిర్ణయం తీసుకోలేదని ప్రధాని తెలిపారు. ఈ విషయంపై రాష్ట్ర ప్రభుత్వాలతో చర్చించిన తర్వాతే తుది నిర్ణయానికి వస్తామని వెల్లడించారు. వ్యాక్సిన్ పంపిణీలో కేంద్రం, రాష్ట్ర ప్రభుత్వాలు కలిసి పనిచేయాలని ఆయన పేర్కొన్నారు.

వ్యాక్సినేషన్‌కు మనకు అనుభవజ్ఞ వ్యవస్థ ఉంది..
ఇతర దేశాలతో పోలిస్తే వ్యాక్సినేషన్ ప్రక్రియలో భారత్‌కు మంచి అనుభవం ఉందని మోదీ తెలిపారు. మన ఆరోగ్య కార్యకర్తలు సమర్థంగా టీకా పంపిణీ చేయగలరని చెప్పారు. భారత్‌కు అతి పెద్ద, మంచి అనుభవజ్ఞులతో కూడిన, పారదర్శకమైన నెట్‌వర్క్‌ ఉందని మోదీ పేర్కొన్నారు.

వ్యాక్సినేషన్‌ విధానంపై సలహాలు, సూచనలను ఇవ్వాలని అఖిలపక్ష నేతలను మోదీ కోరారు. ఆ సలహాలను లిఖితపూర్వకంగా పంపించాలని, వాటిని పరిగణనలోకి తీసుకుంటామని చెప్పారు. ‘ప్రస్తుత విపత్కర పరిస్థితుల్లో వదంతులను అరికట్టి, ప్రజల్లో అవగాహన పెంచాల్సిన బాధ్యత మనందరిపైనా ఉంది’ అని మోదీ వ్యాఖ్యానించారు.

భారత్ వైపు ప్రపంచ దేశాల చూపు..
కరోనా వ్యాక్సిన్‌ తయారీ ప్రయత్నాల్లో తప్పకుండా విజయం సాధిస్తామని మన శాస్త్రవేత్తలు ధీమాగా ఉన్నారని ప్రధాని మోదీ తెలిపారు. భద్రమైన, సమర్థమైన, చవకైన వ్యాక్సిన్ కోసం ప్రపంచమంతా ఎదురుచూస్తోందని.. అందుకే ఇప్పుడు ప్రపంచ దేశాల చూపు అంతా భారత్‌ పైనే ఉందని ఆయన తెలిపారు.

Also Read: కరోనా వ్యాక్సిన్: యూకే ఫ్లైట్ల కోసం ఆరా తీస్తున్న భారతీయులు

Must Read: లంగ్స్ దెబ్బతిన్నాయి.. 2 నెలలు పట్టొచ్చు: కదిలించిన హీరో రాజశేఖర్