దుర్మార్గం: వైద్యురాలిపై ఉమ్మి వేసిన కరోనా రోగులు

కరోనా కష్టకాలంలో వైద్య సిబ్బంది, పారిశుద్ధ్య సిబ్బంది ప్రాణాలకు తెగించి విధులు నిర్వహిస్తుండగా.. కొంత మంది దుర్మార్గంగా ప్రవర్తిస్తున్నారు. ఓ వైద్యురాలిపై కరోనా రోగులు ఉమ్మి వేసిన ఘటన త్రిపురలో చోటు చేసుకుంది. కరోనా వార్డులో పేషంట్లను చేర్చించడానికి ప్రయత్నించడమే ఆమె చేసిన తప్పు. పైగా ఆమె సాయం చేయాలనుకుంది కూడా అప్పుడే బిడ్డకు జన్మనిచ్చిన ఐదుగురు మాతృమూర్తులకు కావడం గమనార్హం.

వెస్ట్ త్రిపుర జిల్లాలోని భ‌గ‌త్ సింగ్ యూత్ హాస్టల్‌ను కొవిడ్ కేర్ సెంట‌ర్‌గా మార్చారు. ఇందులో 300 పడకలు సిద్ధం చేయగా.. ప్రస్తుతం 270 మంది రోగులు కరోనాకు చికిత్స పొందుతున్నారు. అయితే.. శుక్రవారం (జులై 24) మరో ఆస్పత్రిలో బిడ్డలకు జన్మనిచ్చిన ఐదుగురు బాలింతలను తీసుకొని ఓ అంబులెన్స్ అక్కడికి వచ్చింది. ఆ అంబులెన్స్‌ను చూడగానే.. కొంత మంది మహిళా రోగులు ఆందోళనకు దిగారు.

కరోనా వార్డుల్లో పడకలు నిండిపోయాయని.. ఇక కొత్త వారిని చేర్పించొద్దని మహిళా రోగులు వైద్య సిబ్బందితో వాగ్వాదానికి దిగారు. విషయం తెలుసుకున్న ఆ జిల్లా ప‌ర్యవేక్షణ అధికారి డాక్టర్ సంగీత చ‌క్రవర్తి వెంటనే అక్కడికి చేరుకొని వారికి నచ్చజెప్పే ప్రయత్నం చేశారు. కానీ, వారు ఏమాత్రం వినకుండా ఆమెతోనూ వాగ్వాదానికి దిగారు. ఈ క్రమంలో ఇద్దరు మహిళా రోగులు వైద్యురాలికి అతి సమీపంగా వచ్చి ఉమ్మి వేశారు.

ఘటనపై డాక్టర్ సంగీత చక్రవర్తి ఆగ్రహం వ్యక్తం చేశారు. వెంటనే పోలీసులకు ఫిర్యాదు చేశారు. ఘటనపై కేసు న‌మోదు చేసినట్లు జిల్లా ఎస్పీ మానిక్ లాక్ తెలిపారు. సీసీటీవీ ఫుటేజీ ఆధారంగా ఇద్దరు నిందితుల‌ను గుర్తించినట్లు చెప్పారు. నిందితులు కరోనా నుంచి కోలుకోగానే అరెస్ట్ చేసి కేసు విచారణ జరుపుతామని, క‌ఠిన చ‌ర్యలు తీసుకుంటామ‌ని తెలిపారు.

‘కొవిడ్-19తో 24x7 వేళల్లో పోరాడుతున్న వైద్యులు, ఆరోగ్య సిబ్బందిని ఇలాంటి ఘటనలు నిరుత్సాహపరుస్తాయి. కరోనా వైరస్ పంజా విసురుతున్న ఇలాంటి క్లిష్ట సమయంలో ప్రజల నుంచి ఇలాంటి ప్రవర్తన ఎదురవడం ఎంతమాత్రం శ్రేయస్కరం కాదు’ అని డాక్టర్ సంగీత చక్రవర్తి ఆవేదన వ్యక్తం చేశారు. ఆల్ త్రిపుర గవర్నమెంట్ డాక్టర్స్ అసోసియేషన్ ఈ ఘటనను ఖండించింది. డాక్టర్ సంగీత చక్రవర్తితో దుర్మార్గంగా ప్రవర్తించిన రోగులపై కఠిన చర్యలు తీసుకోవాలని డిమాండ్ చేసింది.

Also Read: మాస్క్ లేదని భార్య పెట్‌కోట్ తీసి మూతికి చుట్టుకున్నాడు.. నవ్వు ఆపుకోని పోలీస్, వీడియో వైరల్

Must Read: ముస్లిమే.. కానీ, రాముడంటే ప్రాణం, మందిరం నిర్మాణానికి మట్టితో బయల్దేరాడు