కరోనా వ్యాక్సిన్లలో ఈ రెండే అత్యుత్తమం

కొవిషీల్డ్, కొవాగ్జిన్ భద్రతపై ఎలాంటి అనుమానాలు అక్కర్లేదని నీతి ఆయోగ్ సభ్యుడు డాక్టర్ వీకే పాల్ తెలిపారు. కొవిడ్ వ్యాక్సిన్లలో ఈ రెండే అత్యుత్తమమైనవని పేర్కొన్నారు. వేలాది మందిపై ప్రయోగాలు జరిపిన తర్వాతే వాటికి ఎమర్జెన్సీ అనుమతి ఇచ్చినట్లు స్పష్టం చేశారు. ఈ రెండు వ్యాక్సిన్లతో ఎలాంటి సైడ్ ఎఫెక్ట్స్ కూడా లేవని వివరించారు. ప్రజలకు ఈ విషయాలపై అవగాహన కల్పించాలని ఆయన సూచించారు

దేశీయంగా అభివృద్ది చేసిన కొవిడ్ వ్యాక్సిన్లు కొవిషీల్డ్, కొవాగ్జిన్.. రెండూ సురక్షితమైనవేనని అటు కేంద్ర ఆరోగ్య శాఖ పేర్కొంది. ఈ రెండు వ్యాక్సిన్లకు ఇప్పటికే అత్యవసర వినియోగం కింద అనుమతి ఇచ్చిన విషయం తెలిసిందే. దేశంలో త్వరలో మరో నాలుగు టీకాలు అందుబాటులోకి వస్తాయని వెల్లడించింది. జైడస్‌ క్యాడిలా, స్పుత్నిక్‌-వి, బయోలాజికల్‌-ఇ, జెన్నోవా సంస్థల వ్యాక్సిన్ ప్రయోగాలు పురోగతిలో ఉన్నట్లు తెలిపింది. మరికొద్ది రోజుల్లోనే వీటిని కూడా ఆమోదించే అవకాశాలు ఉన్నాయని తెలిపింది.

వ్యాక్సిన్లపై ప్రజలకు ఎలాంటి సందేహాలు లేకుండా విస్తృత ప్రచారం కల్పించాలని రాష్ట్రాలు, కేంద్రపాలిత ప్రాంతాలను ఆరోగ్య శాఖ ఆదేశించింది. స్థానిక భాషల్లో అవగాహన కల్పించాలని సూచించింది.

‘రెండు మోతాదుల్లో వ్యాక్సిన్ తీసుకున్న రెండు వారాల వరకు పూర్తి జాగ్రత్తలు తీసుకోవాలి. పంపిణీ సమయంలో ఇతర ఆరోగ్య కార్యకలాపాలకు అంతరాయం కలగకుండా జాగ్రత్తలు తీసుకోవాలి’ అని రాష్ట్రాలకు కేంద్ర ఆరోగ్య శాఖ సూచించింది. ఈ మొత్తం ప్రక్రియ అంతా ఆధునిక టెక్నాలజీ ద్వారా డిజిటల్‌గా అనుసంధానంతో అవుతుందని.. ప్రజలు కూడా సహకరించాలని కోరింది.

Also Read:

✦ కరోనా వ్యాక్సిన్: కామన్‌ డౌట్స్ - సమాధానాలు

✦ ఆ దేశంలో తొలి కరోనా కేసు.. భయపడాల్సిన పని లేదట!