అలాంటి వారు మా టీకా తీసుకోవద్దు: సీరం ఇన్‌స్టిట్యూట్

అలర్జీ కలిగితే తమ వ్యాక్సిన్ తీసుకోవద్దని సీరం ఇన్‌స్టిట్యూట్ ఆఫ్ ఇండియా సంస్థ స్పష్టం చేసింది. కొవిషీల్డ్ టీకా పూర్తి వివరాలతో ఫ్యాక్ట్‌ షీట్‌ను విడుదల చేసింది. సీరం ఇన్‌స్టిట్యూట్‌ వెబ్‌సైట్‌లో అందుబాటులో ఉంచింది. కొవిషీల్డ్‌ వ్యాక్సిన్‌ తయారీలో ఉపయోగించిన రసాయన పదార్థాల వల్ల ఎవరైనా తీవ్ర అలర్జీలకు గురైతే.. వ్యాక్సిన్‌ను తీసుకోకపోవడమే మంచిదని తెలిపింది. అలాంటి వ్యక్తులు టీకా రెండో డోసు తీసుకోవద్దని సూచించింది.

కరోనా వ్యాక్సిన్ తయారీలో వినియోగించిన ఉత్పత్తులను (Ingredients) సీరం సంస్థ వెల్లడించింది. ప్రజలు వ్యాక్సిన్‌ను తీసుకొనే ముందు ఆరోగ్య సిబ్బందికి తమ ఆరోగ్యానికి సంబంధించిన అన్ని విషయాల గురించి తెలపాలని సూచించింది. వారికి ఏవైనా అలర్జీ సమస్యలు ఉంటే, ఆ వివరాలను వైద్య సిబ్బందికి తెలపాలని పేర్కొంది. టీకా తీసుకొనేవారికి జ్వరం, రక్త సమస్యలు ఉన్నా, గర్భిణులు అయినా ఆరోగ్య సిబ్బందికి ముందుగానే సమాచారం అందించాలని సూచించారు.

కొవిషీల్డ్ తీసుకోవడానికి ముందు మరేదైనా ఇతర టీకా తీసుకున్నా.. ఆరోగ్య సిబ్బందికి తెలపాలని సీరం తన ప్రకటనలో సూచించింది. అటు భారత్ బయోటెక్ కూడా ఫ్యాక్ట్ షీట్‌ను విడుదల చేసింది. దేశంలో ఇప్పటికే 4 లక్షలకు పైగా మందికి కరోనా వ్యాక్సిన్ ఇచ్చారు.