2కి.మీ దూరం తీసుకెళ్లి పుట్టిన దూడను చూపించిన ఆవు.. అద్భుతం!

అద్భుతం జరిగేటప్పుడు ఎవ్వరూ గుర్తించరు.. జరిగిన తర్వాత ఎవరూ గుర్తించాల్సిన అవసరం లేదు.. సూపర్ స్టార్ మహేశ్ బాబు నటించిన ‘ఖలేజా’ సినిమాలో త్రివిక్రమ్ రాసిన పాపులర్ డైలాగ్ ఇది. కర్ణాటకలోని ఓ గోశాలలో ఇలాంటిదే ఓ అద్భుతం జరిగింది. గర్భంతో ఉన్న ఓ ఆవు రోజూలాగే మేతకు వెళ్లింది. కానీ సాయంత్రానికి ఎంతకీ తిరిగిరాలేదు. దీంతో గోశాల నిర్వాహకులు ఆందోళనకు గురయ్యారు. కానీ, మరుసటి రోజు ఉదయాన్నే ఆ ఆవు గోశాలకు వచ్చింది.

తన ఆలనా పాలనా చూసే మహిళ వద్దకు వచ్చిన ఆ ఆవు సైగలతోనే ఏదో చెప్పింది. ఆ విషయం ఆ మహిళకు ఇట్టే అర్థమైంది. ఆ ఆవు బిడ్డకు జన్మనిచ్చింది. ఆ బిడ్డను ఆ ఇంటికి (గోశాల) తీసుకురావాలనే దాని తపన. ఆ మహిళను వెంటబెట్టుకొని.. వచ్చిన మార్గాన్నే బయల్దేరింది.

తన పోషణ చూసే మహిళలను (యజమాని కారు) అలా రెండు కిలోమీటర్ల దూరం నడిపించిన ఆ ఆవు.. చెట్లు, పుట్టలు దాటుకుంటూ అటవీ ప్రాంతానికి తీసుకెళ్లింది. అక్కడ ఓ చోట తాను జన్మనిచ్చిన దూడను చూపెట్టింది. ఆ దూడను చూడగానే మహిళ దాన్ని తన దగ్గరకు తీసుకొని ముద్దు చేసింది. ఆ దృశ్యం చూసి ఆవు పులకరించింది. ఈ అద్భుత ఘట్టం ఆసాంతాన్ని వాళ్లు వీడియో తీశారు. ఇప్పుడది సోషల్ మీడియాలో వైరల్‌గా మారింది.


అడవిలో ప్రసవించిన ఆ ఆవు తన బిడ్డను గోశాలలో పోషకులే కాపాడగలరని ఎలా నమ్మింది? చెట్లు, పుట్టలు దాటుకుంటూ సరిగ్గా ఆ చోటుకే మహిళను ఎలా తీసుకెళ్లగలిగింది? ఏ కుక్కలో, క్రూర జంతువుల బారినో పడకుండా తన బిడ్డను రాత్రంతా ఎలా కాపాడుకుంది? అడవిలో ఒంటరిగా వదిలేసి వచ్చినా ఆ దూడ ఏ ప్రమాదం బారిన పడకుండా క్షేమంగా ఎలా ఉంది? ఇవన్నీ చిక్కు ప్రశ్నలే. వీటికి సమాధానం దొరికితే అద్భుతమే. ‘సామీ.. ఇది నీ దర్శనం.. ఇదే నిదర్శనం..’ ఈ వార్తా కథనం ఆరంభంలో చెప్పుకున్న డైలాగ్ ముగింపు వాక్యాలివి..!

(Disclaimer: ఈ ఘటనను ‘సమయం’ వెరిఫై చేయలేదు. ఫేస్‌బుక్‌లో వైరల్ అవుతున్న వీడియో ఆధారంగా వివరాలు తీసుకోవడమైనది.)

Must Read:

✦ ఇండియాకు 4 రాజధానులు కావాలి.. కొత్త డిమాండ్

✦ తండ్రిని గదిలో బంధించి తిండి పెట్టని కొడుకు.. ఆకలితో విలవిల్లాడి మృతి

✦ యువకుల బ్యాగ్‌లో శానిటరీ ప్యాడ్స్.. అమ్మ చెప్పిన మాట కోసం, హ్యాట్సాఫ్

✦ రైల్లో మహిళకు అనుకోని ఆపద.. దేవుడిలా కాపాడిన దివ్యాంగుడు, అద్భుతం

✦ అమ్మా, నాన్న పెళ్లి చేసుకున్నట్టు సాక్ష్యం ఏది.. నీకు ఆస్తి దక్కదు, షాకింగ్ తీర్పు