షమీ భార్య పొలిటికల్ ఎంట్రీ, క్రికెటర్‌కు మరిన్ని కష్టాలు?

టీమిండియా క్రికెటర్ మహ్మద్ షమీ భార్య హసీన్ జహన్ రాజకీయాల్లో ఎంట్రీ ఇచ్చింది. గత కొంత కాలంగా షమీపై తీవ్ర ఆరోపణలు గుప్పిస్తోన్న ఆమె.. కాంగ్రెస్ పార్టీలో చేరింది. ముంబై కాంగ్రెస్ ప్రెసిడెంట్ సంజయ్ నిరూపమ్ సమక్షంలో ఆమె మంగళవారం కాంగ్రెస్ కండువా కప్పుకున్నారు. మోడల్ అయిన జహన్.. ఈ ఏడాది ఆరంభంలో తన భర్తపై తీవ్ర ఆరోపణలు చేశారు.

షమీ తనను మానసికంగా, శారీరకంగా వేధించాడని.. అతడికి చాలా మంది మహిళలతో వివాహేతర సంబంధాలు ఉన్నాయని జహన్ ఆరోపించారు. ఏప్రిల్ 10న షమీ, అతడి కుటుంబ సభ్యులపై కోల్‌కతాలో గృహ హింస కేసు నమోదు చేసింది. భర్త నంచి తనకు జీవనభృతి అందేలా చూడాలని కోరుతూ ఆమె అలీపూర్ న్యాయస్థానాన్ని ఆశ్రయించింది. షమీ వేరే అమ్మాయిలతో చేసిన చాటింగ్ వివరాలను ఆమె సోషల్ మీడియా ద్వారా బయటపెట్టింది. కాగా, తన భార్య ఆరోపణలను షమీ ఖండించాడు.