ఢిల్లీలోని పొలిటీషియన్స్‌ని కంగారు పెడుతున్న బెంగుళూరు డైరీ

బెంగుళూరులోని కాంగ్రెస్ ఎమ్మెల్సీ గోవింద రాజు ఇంట్లో లభించిన ఓ డైరీలో రాసిన రాతలు, ఢిల్లీలోని కాంగ్రెస్ పెద్దలని కంగారు పెడుతున్నాయా అంటే, బెంగుళూరు మిర్రర్ ప్రచురించిన ఓ కథనాన్ని బట్టి అవుననే తెలుస్తోంది. 2014 లోక్‌సభ ఎన్నికల సమయంలో పార్టీ హై కమాండ్‌తోపాటు కాంగ్రెస్ పార్టీలో సీనియర్ నేతలకి సమర్పించుకున్న ముడుపుల వివరాలు ఈ డైరీలో పొందుపర్చి వుండటమే అందుకు కారణంగా ఈ కథనం పేర్కొంది.

గతేడాది మార్చిలో ఐటీ అధికారులు జరిపిన దాడుల్లో ఈ డైరీ లభ్యమైంది. తమ తనిఖీల్లో భాగంగా ఐటీ అధికారులు స్వాధీనం చేసుకున్న ఈ డైరీలో SG, RG, AP, AICC, M Vora, DGS అని షార్ట్‌కట్‌లో రాసివున్న కొన్ని పేర్లు కనిపించాయి. వీళ్లేకాకుండా ఇంకా అనేకమంది నేతల పేర్లు షార్ట్ కట్‌లో రాసివున్నాయి. వీరికి సమర్పించుకున్న ముడుపుల వివరాలు సైతం వారి పేర్ల పక్కనే రాసివున్నాయి.

ఈ షార్ట్ కట్‌లకి అసలు పేర్లు రాహుల్ గాంధీ, సోనియా గాంధీ, అహ్మద్ పటేల్, ఏఐసీసీ, మోతీలాల్ ఓరా, దిగ్విజయ్ సింగ్ అయి వుంటాయని భావిస్తున్న ఇన్‌కమ్ టాక్స్ విభాగం అధికారులు.. సదరు నేతలని తమ ముందు హాజరు కావాల్సిందిగా ఆదేశిస్తూ త్వరలోనే నోటీసులు జారీ చేసే అవకాశాలున్నాయని తెలుస్తోంది. ఢిల్లీలోని ఐటీ ఆఫీస్ వారికి నోటీసులు జారీ చేసే అవకాశం లేకపోలేదు అని బెంగుళూరు ఐటీ విభాగం అధికారులు బెంగుళూరు మిర్రర్‌కి తెలిపినట్టు సమాచారం. ఈ ముడుపుల వ్యవహారంలో మొత్తం రూ.600 కోట్ల వరకు చేతులు మారినట్టు అధికారులు అనుమానిస్తున్నారు.

సీఎం సలహాదారు, విశ్రాంత ఐఏఎస్ ఆఫీసర్ అయిన కెంపయ్య పేరు ఎలాగూ స్పష్టంగా రాసి వుండటంతో బెంగుళూరు ఐటీ అధికారులు ఆయనకి నోటీసులు జారీచేయడం, ఆయన రహస్యంగా ఆఫీస్ వర్కింగ్ హవర్స్ ముగిసిన తర్వాత ఐటీ ఆఫీస్‌కి రహస్యంగా వెళ్లి తన వాంగ్మూలాన్ని ఇచ్చి రావడం కూడా జరిగిపోయాయి. దీంతో ఇక ఇప్పుడు ఈ కేసులో తాము కూడా విచారణ ఎదుర్కోవాల్సి వస్తుందేమోననే భయం కాంగ్రెస్ పార్టీ సీనియర్ నేతల్ని వేధిస్తున్నట్టు తెలుస్తోంది.