వీడియో: ఇళ్లలోకి విష సర్పాలు.. కేరళలో స్నేక్ అలర్ట్

వరదలు తగ్గుముఖం పట్టడంతో కేరళలో జనజీవనం మెల్లగా సాధారణ స్థితికి చేరుకుంటోంది. ప్రజలు ఇళ్లలో పేరుకుపోయిన బురదను తొలగిస్తూ.. శుభ్రం చేసుకుంటున్నారు. వరదలు తగ్గినా.. జనాల్ని పాముల బెడద వేధిస్తోంది. ఇళ్లలోకి విష సర్పాలు ప్రవేశించడంతో జనం భయ భ్రాంతులకు లోనవుతున్నారు. ఒక ఇంట్లోకి కొండ చిలువ ప్రవేశించగా.. మరో ఇంట్లో బెడ్ మీద రెండు భారీ తాచుపాములు కనిపించడంతో జనాలు షాకయ్యారు. స్నేక్ ఎక్స్‌పర్ట్‌లు పాములను పట్టుకుని సమీప అటవీ ప్రాంతాల్లో వదులుతున్నారు.

వరదలు తగ్గుముఖం పట్టిన తర్వాత కేరళలో పాము కాట్లు పెరిగిపోయాయి. దీంతో రాష్ట్రంలో స్నేక్ అలర్ట్ ప్రకటించారు. వరద ముంపునకు గురైన ప్రాంతాల్లోని హాస్పిటళ్లలో యాంటీ వీనంతోపాటు ఇతర మందులను అందుబాటులో ఉంచుతున్నారు.
ఇళ్లలోని వార్డ్ రోబ్‌లు, కిచెన్, కప్ బోర్డులు, కార్పెట్లు, వాషింగ్ మెషీన్లు, దుస్తులలో పాములు దాగి ఉంటాయని.. ప్రజలు అప్రమత్తంగా ఉండాలని మలయాళ మీడియా సూచించింది.