అట్టుడుకుతున్న డార్జిలింగ్: ఇద్దరి మృతి

ప్రత్యేక గూర్ఖాలాండ్ రాష్ట్రాన్ని డిమాండ్‌ చేస్తూ గూర్ఖా జన్‌ముక్తి మోర్చా (జీజేఎం) చేపట్టిన ఆందోళనలు శనివారం తారాస్థాయికి చేరుకున్నాయి. ఆందోళనకారుల దాడులు, భద్రతా దళాల కాల్పులతో డార్జిలింగ్ అట్టుడుకుతోంది. భద్రతా బలగాలు, జీజేఎం కార్యకర్తలు హోరాహోరీగా తలపడటంతో సింగమరి ప్రాంతం యుద్ధ క్షేత్రాన్ని తలపించింది. రెచ్చిపోయిన ఆందోళనకారులు పోలీసులపై పెట్రోల్ బాంబులు విసిరారు, రాళ్లు రువ్వారు. పలు పోలీసు వాహనాలకు నిప్పు పెట్టారు. దీంతో ఆందోళనకారులను చెదరగొట్టేందుకు పోలీసులు భాష్పవాయు గోళాలను ప్రయోగించారు. అయినప్పటికీ పరిస్థితి అదుపులోకి రాకపోవడంతో హుటాహుటిన ఆర్మీని రంగంలోకి దించారు.

పోలీసుల కాల్పుల్లో తమ కార్యకర్తల్లో ఇద్దరు చనిపోయారని జీజేఎం నేత బినయ్ తమంగ్ ఆరోపించారు. అయితే జీజేఎం ఆరోపణలను పోలీస్ ఏడీజీ అనూజ్ శర్మ ఖండించారు. ఈ ఘటనలో పోలీసుల తప్పు లేదని తేల్చి చెప్పారు. జీజేఎం కార్యకర్తలే పోలీసులపై కాల్పులు జరిపారని.. ఈ కాల్పుల్లో ఒక కార్యకర్త మరణించాడని వెల్లడించారు. అంతేకానీ పోలీసులు ఆందోళనకారుపై కాల్పులు జరపలేదన్నారు. మరోవైపు జీజేఎం ఆందోళనకారులపై ముఖ్యమంత్రి మమతా బెనర్జీ మండిపడ్డారు. జీజేఎం ఉగ్రవాదులతో సంబంధాలు పెట్టుకుందని.. వారి వద్ద నుంచే కార్యకర్తలు తుపాకులు తెచ్చుకున్నారని మమత ఆరోపించారు. ఈ మారణాయుధాలు ఒక్క రోజులో వారి వద్దకు రాలేదని, చాలా రోజుల నుంచే సేకరిస్తున్నారని మీడియాతో అన్నారు.

మరోవైపు జీజేఎం కార్యకర్తల దాడిలో ఐర్బీ సెకెండ్ బెటాలియన్ అసిస్టెంట్ కమాండెంట్ కిరణ్ తమాంగ్ ప్రాణాలొదిలారని ఎస్పీ అఖిలేష్ చతుర్వేది ప్రకటించారు. అయితే తమాంగ్ చనిపోలేదని, ఆయన పరిస్థితి విషమంగా ఉందని సీఎం మమత బెనర్జీ మీడియాకు వెల్లడించారు. జీజేఎం‌తో చర్చలకు రాష్ట్ర ప్రభుత్వం సిద్ధంగా ఉందని, కానీ హింసతో ఈ సమస్య పరిష్కారం కాదని మమత అన్నారు. హింసను ప్రోత్సహిస్తుంటే తాము చూస్తూ ఊరుకోమని మమత హెచ్చరించారు.