మనిషి కోతి నుంచి పుట్టలేదు.. నేనూ సైన్స్ చదివా: కేంద్ర మంత్రి

మనిషి కోతి నుంచి పుట్టాడనేది పూర్తిగా అసత్యమని, దానికి సంబంధించి ఎలాంటి ఆధారాలు లేవని కేంద్ర మంత్రి సత్యపాల్ సింగ్ అన్నారు. చార్లెస్ డార్విన్ సిద్ధాంతాన్ని ఆయన తప్పుబట్టడంతో ఈ అంశం వివాదాస్పదంగా మారింది. పలువురు శాస్త్రవేత్తలు సత్యపాల్ వ్యాఖ్యలను తప్పుబట్టారు. రాజకీయ నేతగా మారిన మాజీ ఐపీఎస్ ఆఫీసర్ సత్యపాల్ సింగ్ శుక్రవారం (జనవరి 18) ఔరంగాబాద్‌లో నిర్వహించిన ‘ఆల్ ఇండియా వైదిక్ సమ్మేళన్’లో ప్రసంగిస్తూ ఈ వ్యాఖ్యలు చేశారు.

‘డార్వినిజం అనేది కల్పితం. అసలు మనిషి కోతి నుంచి పుట్టినట్లు ఎలాంటి ఆధారాలు లేవు. ఓ కోతి మనిషిలా మారినట్లు మన పూర్వీకులు ఎక్కడా చెప్పలేదు.. రాయలేదు. డార్విన్ సిద్ధాంతం శాస్త్రీయంగా తప్పు. దాన్ని సైన్స్ బుక్స్‌లో నుంచి తొలగించాలి’ అని సత్యపాల్ అన్నారు.

మంత్రి వ్యాఖ్యలను శాస్త్రవేత్తలు తీవ్రంగా తప్పుబట్టారు. ఇది సైన్స్‌ను, సైంటిస్టులను అవమానించడమే అవుతుందని వాళ్లు పేర్కొన్నారు. ఇలాంటి తప్పుడు ప్రచారాలను అడ్డుకోవాలని పిలుపునిచ్చారు.

‘50 లక్షల ఏళ్ల కిందట చింపాంజీల నుంచి మనిషి వచ్చాడు. మన పూర్వీకులెవరూ ఆ పరిణామాన్ని ఎక్కడా రాసి ఉంచే అవకాశం లేదు’ అని బెంగళూరులోని ఐఐఎస్‌సీ ప్రొఫెసర్ గడాగ్‌కర్ అన్నారు. మానవ వనరుల అభివృద్ధి శాఖ చూసే ఓ మంత్రి ఇలాంటి వ్యాఖ్యలు చేయడం తగదని, ఇది ఆయన శాఖకే అవమానకరమని బయోకాన్ సీఎండీ కిరణ్ మజుందార్ షా అన్నారు.

అయితే.. సత్యపాల్ సింగ్ మాత్రం తన వాదనను సమర్థించుకున్నారు. ‘ఆధారం లేకుండా నేను ఏదీ మాట్లాడను. నేను కూడా సైన్స్ విద్యార్థినే. ఢిల్లీ యూనివర్సిటీ నుంచి కెమెస్ట్రీలో పీహెచ్‌డీ చేశాను’ అని సత్యపాల్ వాదిస్తున్నారు.