మంత్రి సోదరుడి ఇంట్లో విగతజీవులుగా ఇద్దరు మహిళలు

పశ్చిమ బెంగాల్‌ మంత్రి, టీఎంసీ నేత మలయ్‌ ఘటక్‌ సోదరుడి ఇంట్లో ఇద్దరు మహిళలు అనుమానాస్పద రీతిలో మృతి చెందడం రాష్ట్రంలో సంచలనం సృష్టిస్తోంది. మలయ్‌ సోదరుడు, దివంగత ఆషిమ్‌ ఘటక్‌ భార్య జయశ్రీ, ఆమె కుమార్తె నీలమ్‌ సోమవారం (మే 27) తమ ఇంట్లోనే విగతజీవులుగా కనిపించారు. స్థానికులు వారి మృతదేహాలను కుళ్లిన స్థితిలో గుర్తించారు. ఇంట్లోంచి దుర్వాసన వస్తుండటంతో పోలీసులకు సమాచారం ఇవ్వగా.. విషయం వెలుగులోకి వచ్చింది.

రాష్ట్ర మంత్రి, తృణమూల్‌ కాంగ్రెస్‌ నేత మలయ్ ఘటక్ సోదరుడు ఆషిమ్ (70) రెండేళ్ల కిందట దామోదర్‌ నది ఒడ్డున పూజలు చేస్తూ ప్రమాదవశాత్తు నదిలో జారిపడి ప్రాణాలు కోల్పోయారు. మహాలయ సందర్భంగా ఆయన తమ పూర్వీకులకు ప్రత్యేక పూజలు చేస్తుండగా ఈ ప్రమాదం జరిగింది. నాటి నుంచి ఆయన భార్య జయశ్రీ, కుమార్తె నీలమ్‌తో కలిసి అసన్‌సోల్‌లోని హిందుస్థాన్‌ పార్క్‌ ప్రాంతంలో నివసిస్తున్నారు.

సోమవారం ఉదయం కూరగాయలు అమ్మే వ్యాపారి ఒకరు జయశ్రీ ఇంటికి వచ్చారు. ఎంత పిలిచినా లోపలి నుంచి ఎవరూ తలుపు తీయకపోవడం, ఇంటి నుంచి దుర్వాసన వస్తుండటంతో అతడు వెంటనే పోలీసులకు సమాచారం ఇచ్చాడు. పోలీసులు అక్కడకు చేరుకుని తలుపు బద్దలుకొట్టి చూడగా.. జయశ్రీ, నీలమ్‌ మృతదేహాలు కుళ్లిన స్థితిలో కనిపించాయి.

మృతదేహాలను స్వాధీనం చేసుకొని పోస్టుమార్టం నిమిత్తం పంపించారు. అనుమానాస్పద మృతిగా కేసు నమోదు చేసుకున్న పోలీసులు దర్యాప్తు చేపట్టారు. ఆషిమ్‌ మరణించిన నాటి నుంచి జయశ్రీ, ఆమె కుమార్తె తీవ్ర డిప్రెషన్ (కుంగుబాటు)కు గురయ్యారని స్థానికులు చెబుతున్నారు. వారు ఎవరితోనూ పెద్దగా మాట్లాడేవారు కాదని తెలిపారు. వీరు ఆత్మహత్య చేసుకుని ఉంటారని పోలీసులు అనుమానిస్తున్నారు. ఘటనకు సంబంధించిన పూర్తి వివరాలు తెలియాల్సి ఉంది.